डाक्टरको ओपीडी शुल्क १४ प्रतिशतले वृद्धि, न्यूनतम ४२० देखि ९४० रुपैयाँसम्म कायम

जनस्वास्थ्य सरोकार, काठमाडौं । चिकित्सकहरूको परामर्श शुल्क जेठ १ गतेदेखि लागू हुनेगरी १४ प्रतिशतले बृद्धि गरिएको छ ।

स्वास्थ्य मन्त्रालयको समन्वयमा प्राइभेट हेल्थ इन्स्टिच्युएसन अफ नेपाल (अफिन), नेपाल चिकित्सक संघ (एनएमए), नेपाल मेडिकल काउन्सिलका पदाधिकारीहरूको संयुक्त सहमतिमा शुल्क बढाइएको हो ।

स्वास्थ्य मन्त्रालयले नेपाल राष्ट्र बैंकको मुद्रास्फीतिका आधारमा प्रत्येक २/२ वर्षमा शुल्क पुनरावलोकन गर्ने अधिकार २०७८ भदौ ३० मा नै दिइएको आधारमा शुल्क बढाइएको नेपाल चिकित्सक संघका अध्यक्ष डा. अनिलबिक्रम कार्कीले जानकारी दिनुभयो ।

अनुभव तथा योग्यताका आधारमा तोकिएको नयाँ ओपिडी शुल्क न्यूनतम रू.४ सय २० देखि बढीमा रू ९ सय ४० सम्म कायम गरिएको छ । अब एमबीबीएस तथा बीडीएस गरी ५ वर्षसम्म अनुभव भएकाहरूले ४२० र त्यसभन्दा बढी अनुभव भएकाहरूले रू. ५ सय १५ लिन पाउनेछन् ।

यस्तै, एमडी एमएसको योग्यता भई पाँच वर्षसम्म अनुभव भएकाहरूले रू.७५० र त्यसभन्दा बढी अनुभव भएकाहरूले रू.८ सय लिनेछन् । डीएम एमसीएच गरी पाँच वर्षसम्म अनुभव भएकाहरूले रू.८ सय ८० र त्यसभन्दा बढी अनुभव भएकाहरूले रू.९ सय ४० परामर्श शुल्क लिन पाउने छन् ।

एसोसिएसन अफ प्राइभेट हेल्थ इन्स्टिच्युएसन अफ नेपाल (अफिन) का अध्यक्ष डा. पदम खड्काले नियम संगत शुल्क वृद्धि भएको बताउनुभयो । यसअघि २०७७ मा चिकित्सकहरुको परामर्श शुल्क पुनरावलोकन गरिएको थियो ।