आज ५ वर्ष मुनिका बालबालिकाहरूका लागि वृहत खोप कार्यक्रम, छुटेका सबैलाई खोप लगाउन आग्रह

जनस्वास्थ्य सरोकार, काठमाडौँ । सरकारले ५ वर्ष मुनिका देशभरका सबै बालबालिकालाई खोप लगाउन आव्हान गरेको छ । आज बृहत् खोप अभियानको आयोजना गरी सरकारले सो आव्हान गरेको हो । यसअघि वैशाख १५ गते नियमित खोप दिइएको थियो ।

स्वास्थ्य तथा जनसङ्ख्या मन्त्रालयका अनुसार देशैभरीका सबै सरकारी स्वास्थ्य संस्थाबाट राष्ट्रिय खोप तालिका अनुसार १५ महिना भित्रमा लगाउनु पर्ने नियमित खोप छुटेका ५ वर्ष मुनिका सबै बालबालिकालाई नियमित खोप दिईदैछ । मन्त्रालयले आज पाँच वर्ष मुनिका बालबालिकालाई १३ प्रकारको खोप दिँदै छ ।

जन्मने बित्तिकै लगाउने बिसिजी, ६ हप्तामा लगाउने रोटा, पोलियो, पिसिभी, डिपिटी, र हेप बि हिब, १० हप्ता भित्र लगाउने रोटा, पोलियो, पिसिभी, डिपिटी, र हेप बि हिब, १४ हप्ता भित्र लगाउनु पर्ने पोलियो, एफएईपिभी, हेप बि हिब, ९ महिना भित्र लगाउनु पर्ने, एफ आई, पिभि, पिसिभी, दादुरा रुबेला र १५ महिना भित्र लगाउनु पर्ने दादुरा–रुबेला र टाइफाइड जस्ता खोप अहिले लगाइँदै छ ।
स्वास्थ्य तथा जनसंख्यामन्त्री मोहनबहादुर बस्नेतले आफ्ना बालबालिकालाई नियमित खोप लगाउन भिडियो सन्देशमार्फत अभिभावकलाई आग्रह गर्नुभएको छ । ।