डा. कैलाश भण्डारीको टिमले बेनीमा ५ केजीको न्युरोफाइब्रोम्याटोसिस ट्युमर निकाल्यो

जनस्वास्थ्य सरोकार, म्याग्दी । म्याग्दी जिल्लाको बेनी अस्पतालमा ५६ वर्षीया महिलाको ५ केजीको न्युरोफाइब्रोम्याटोसिस ट्युमर निकालिएको छ ।

नेपाल अर्थोपेडिक हस्पिटलका निर्देशक एवं वरिष्ठ अर्थोपेडिक सर्जन डा. कैलाश भण्डारीको नेतृत्वमा शुक्रबारदेखि ४ दिनसम्म सञ्चालन गरेको निःशुल्क हाडजोर्नी शल्यक्रिया शिविरको तेस्रो दिन ५ घण्टा लगाएर प्लाष्टिक सर्जन डा. निरज महर्जन लगायतका सर्जनहरूको टिमले सो ट्युमर निकालेको हो ।

ति महिला १५ वर्षदेखि न्युरोफाइब्रोम्याटोसिस ट्युमरबाट पीडित थिइन् । यो नसाबाट आएर छालामा निस्किने ट्युमर हो । उनको शरीरमा अन्य साना साना ट्युमहरु भएपनि यसले तिघ्राको पछाडि झुन्डिएर घुँडासम्म आएकाले उनलाई निकै समस्या भएको थियो । उनलाई हिँड्न र लुगा लगाउन पनि हुँदैनथ्यो । यो ट्युमर क्यान्सर नभएको र यो शल्यक्रियापश्चात्त उनको जीवनशैलीमा निकै सहजीकरण हुने डा. भण्डारीले जानकारी गराउनुभयो ।

दुर्गम भेगका जनतालाई लक्षित गरेर नेपाल अर्थोपेडिक अस्पतालसँगको प्राविधिक सहयोगमा बेनी अस्पताल, बेनी नगरपालिका र रोटरी क्लब अफ काठमाडौं वेष्टको आयोजनामा निःशुल्क हाडजोर्नीको शल्यक्रिया शिविर सुरु गरिएको छ ।

डा. भण्डारीसहित सम्बन्धित विधाका १८ जना चिकित्सकहरूको टोलीबाट अस्पतालमा हाडजोर्नी सम्बन्धी शल्यक्रिया एवं ओपीडी सेवा लिनेहरूको भिड छ ।
शिविरमा ५० देखि ६० जनाको निशुल्क हाडजोर्नीको शल्यक्रिया र एक हजार जनालाई ओपीडी सेवा दिने लक्ष्य राखिएको छ ।

स्वीजरल्याण्डको मेड सोलुसन फाउण्डेसनको आर्थिक सहयोग गभएको सो शिविर जेठ १ गतेसम्म सञ्चालन गरिने छ ।