कांग्रेस सांसद भण्डारीको आग्रह—‘मुलुकमा सुविधासम्पन्न जलन उपचार केन्द्र बनाइयोस्’

जनस्वास्थ्य सरोकार, काठमाडौं । नेपाली कांग्रेसका सांसद चन्द्र भण्डारीले मुलुकमा सुविधासम्पन्न आधुनिक जलन उपचार केन्द्र बनाउन आग्रह गर्नुभएको छ ।

तीन महिनापछि संसद वैठकमा उपस्थित हुनुभएका भण्डारीले आफ्नो उपचारका लागि सरकारले दिने सहयोग हस्पिटल बनाउनमा प्रयोग हुनुपर्ने बताउनुभयो ।

गत फागुन ४ गते काठमाडौंको बुद्धनगरस्थित घरमा ग्याँस सिलिन्डर लिक भएर जलेर गम्भीर घाइते हुनुभएका भण्डारी भारतमा उपचार गराएर केही दिनअघि मात्र स्वदेश फर्कनुभएको थियो ।

सभामुख देवराज घिमिरेले दिएको १२ मिनेटको समयसिमाभित्र रहेर भण्डारीले भन्नुभयो— ‘म कीर्तिपुरबाट जाँदा निदाएको थिएँ । मुम्बईमा सात दिनपछि ब्यूँझिएँ । ब्यूँझँदा धेरै साथीहरूले सहयोग गरेको पाएँ, त्यो सहयोगको सम्मान गर्दै सरकारले दिने सहयोग हस्पिटल बनाउनमा प्रयोग होस् ।’

उहाँलाई बसेर बोल्ने व्यवस्था मिलाइएको थियो ।
आफ्नो उपचारमा सघाउने सरकारप्रति आभार व्यक्त गर्दै भण्डारीले भन्नुभयो —‘म सौभाग्यले बाँचेर आएर यहाँ बोल्न पाएको छु । जवकी विगत तीन वर्षमा त्यहाँ भेन्टिलेटरमा गएका म जस्ता बिरामी तीनजना मात्रै बाँचेका रहेछन् ।’ उहाँले आफूले उपचार गराएका बाउछोराले चलाएको अस्पताल एसियाकै उत्कृष्ट गरेको उल्लेख गर्दै नेपालमा स्वास्थ्यकर्मी र डाक्टरहरूको कमी नभएकोसमेत अनुभव सुनाउनुभयो ।

उहाँले भन्नुभयो—‘मैले प्रधानमन्त्रीलाई अनुरोध गरे हामीले एउटा हस्पिटल बनायौं भने एसियाको सबैभन्दा सबल हस्पिटल नेपाल बन्नसक्छ । यो अनुरोध प्रधानमन्त्रीलाई गर्ने अवसर पाएँ ।’

सांसद भण्डारीको उपचार खर्च सरकारले व्यहोर्ने निर्णय गरेको थियो । भारतबाट फर्किएपछि पत्रकार सम्मेलनमा उहाँले आधुनिक जलन उपचार केन्द्र निर्माणमा जोड दिनुभएको थियो र त्यसका लागि आफू नेतृत्व लिन तयार भएको बताउनुभएको थियो ।

सो घटनामा परेकी उहाँकी आमाको भने जलनकै कारण निधन भएको थियो ।