भेरी अस्पतालमा रेबिजविरुद्धको खोप अभाव

जनस्वास्थ्य सरोकार, बाँके । भेरी अस्पताल नेपालगन्जमा डेढ सातादेखि रेबिजविरुद्धको खोप अभाव भएको छ । अस्पतालले निःशुल्क उपलब्ध गराउँदै आएको खोप नपाइएपछि बिरामीले अस्पताल बाहिरबाट खोप किनेर ल्याउन बाध्य भएका छन् ।

भेरी अस्पताल, नेपालगञ्जले सूचना प्रकाशन गरी निःशुल्क उपलब्ध हुँदै आएको एन्टी रेबिज खोप हाल प्रदेश आपूर्ति केन्द्र र इपिडिमियोलोजी तथा रोग नियन्त्रण महाशाखामा समेत स्टक नभएको जानकारी दिएको छ । अस्पतालले सो खोप उपलब्ध नहुँदासम्म सेवाग्राहीलाई उपलब्ध गराउन नसकिने जनाएको छ ।

भेरी अस्पतालका सूचना अधिकारी डा सङ्केतकुमार रिसालले जहाँबाट खोप आपूर्ति हुने हो त्यहाँबाट नै आपूर्ति नभएकाले अभाव भएको जानकारी दिँदै त्यसका लागि पहल भइरहेको बताउनुभयो । अस्पताल प्रशासनका अनुसार यो खोप लगाउन दैनिक जसो १०० हाराहारीमा बिरामी अस्पताल आउने गर्दछन्।

संघबाट प्रदेशमा आउने र प्रदेशबाट मात्रै अस्पतालमा खोप आउने बताइएको छ । कुकुर लगायत पशुले टोकेको अवस्थामा यो खोप लगाइन्छ ।