कोशी अस्पतालमा विपन्नका लागि ३ सय ३० शय्या निःशुल्क

जनस्वास्थ्य सरोकार, विराटनगर । विराटनगरस्थित कोशी अस्पतालले विपन्न बिरामीका लागि ३ सय ३० शय्या निःशुल्क व्यवस्था गरेको छ ।

मंगलबार आकस्मिक निरीक्षणको क्रममा विराटनगर पुग्नु भएका स्वास्थ्य तथा जनसंख्या मन्त्री मोहनबहादुर बस्नेतको निर्देशनमा कोशी अस्पतालले आईसियू, एचडियू र क्याबिन बाहेकका ३ सय ३० शय्यामा निःशुल्क गरेको हो ।

कोशी अस्पतालका प्रमुख डा. रविनराज सिंहले स्वास्थ्य मन्त्री बस्नेतको निर्देशन अनुसार ३ सय ३० शय्या निःशुल्क गरेको जानकारी दिनुभयो ।

मन्त्री बस्नेतले विपन्न विरामीका लागि शय्यामात्र निःशुल्क नभएर उपचार पनि निःशुल्क हुने बताउनुभयो ।

स्वास्थ्य मन्त्रालय मातहतका सरकारी अस्पतालहरुले जनताको संवैधानिक अधिकारलाई व्यवहारमा लागू गर्दै जाने क्रममा विपन्न, असहाय र बेवारिसे विरामीको उपचार निःशुल्क गर्न आफूले निर्देशन दिएपछि कोशी अस्पतालले आजैदेखि निःशुल्क गर्ने निर्णय गरेको स्वास्थ्य तथा जनसंख्या मन्त्री बस्नेतले जानकारी दिनुभयो ।

मन्त्री बस्नेतले वीर अस्पतालबाट सुरु गरेको विपन्नका लागि शय्या निःशुल्क गर्ने अभियान राजधानी बाहिरबाट पहिलो पटक कोशीबाट सुरु गरिएको र भविस्यमा देशका अन्य सरकारी अस्पतालमा पनि सुरु गर्न लागेको बताउनुभयो ।

निःशुल्क उपचार पाउनका लागि स्थानीय वडाबाट विपन्न, असहाय वा बेवारिसे भएको सिफारिस ल्याउनुपर्ने व्यवस्था गरिएको छ ।

अस्पतालको टिकट काउन्टरमा भीड र अव्यवस्थित देखिएको पाइएपछि मन्त्री बस्नेतले उपचार सेवा सहज बनाउन अनलाईनबाट समेत टिकट काट्न पाउने व्यवस्था गर्न अस्पतालका निर्देशकलाई निर्देशन दिनुभएको थियो ।