बालसुधार समाजका बालबालिकालाई तीन लाख रुपैयाँको छात्रवृत्ति

जनस्वास्थ्य सरोकार, काठमाडौं । मुलुकको स्वास्थ्य र शिक्षा सेवाका क्षेत्रमा क्रियाशील धनयोगा फाउन्डेसन नेपालले बूढानीलकण्ठ नगरपालिका–५ स्थित अनाथ असहाय बालसुधार समाजमा आश्रित १० बालबालिकालाई एक वर्षका लागि छात्रवृत्ति सहायता स्वरूप तीन लाख रूपैयाँ प्रदान गरेको छ ।

बाल सुधार समाजमा बिहीबार आयोजित छात्रवृत्ति वितरण कार्यक्रममा धनयोगा फाउण्डेसन, नेपाली अध्यक्ष स्मृति शर्मा तिवारी र बूढानीलकण्ठ नगरपालिकाकी उपप्रमुख अनिता लामाले बालसुधार समाजका पदाधिकारीहरूलाई उक्त रकमको चेक हस्तान्तर गर्नुभयो ।

छात्रवृत्ति वितरण कार्यक्रमलाई सम्बोधन गर्दै उपमेयर लामाले फाउण्डेसनको उक्त सहयोग रकम बालबालिकाको शारीरिक, मानसिक र बौद्धिक विकासमा पूर्ण सदुपयोग हुनुपर्ने बताउनुभयो । फाउण्डेसनकी अध्यक्ष तिवारीले उक्त रकमको सदुपयोग भए संस्थाले छात्रवृत्ति कार्यक्रमलाई आगामी वर्ष पनि निरन्तरता दिने बताउनुभयो ।

फाउण्डेसनका सदस्य डा.महेश कुमार गौतमले बालसुधार समाजमा आश्रित बालबालिकाको नियमित स्वास्थ्य परीक्षणमा ध्यान दिइनुपर्ने बताउनुभयो । उक्त अवसरमा उहाँले छात्रवृत्ति पाएका बालबालिकाको स्वास्थ्य परीक्षण पनि गर्नुभएको थियो ।

बालसुधार समाजका तर्फबाट महासचिव रुस्तम खड्काले धन्यवाद ज्ञापन गर्नुभएको थियो । धनयोगा फाण्डेसन, अमेरिकाद्वारा प्रायोजित छात्रवृत्ति वितरण कार्यक्रमको समन्वय तथा सहजीकरण बूढानीलकण्ठ नगरपालिकाले गरेको हो ।

कार्यक्रममा फाउण्डेसन र बालसुधार समाजका अन्य पदाधिकारीहरूको पनि उपस्थिति थियो ।

यसैगरी धनयोगा फाउन्डेसनले यसैवर्ष श्री सरस्वती वाल आश्रमलाई १० जना बालबालिकाका लागि ३ लाख २ हजार ६ सय र श्री पूर्वाञ्चल ज्ञानचक्सु स्कुल धरानलाई २० जना बालबालिकाका लागि ८ लाख ५८ हजार धनयोगा छात्रवृत्ति २०२३ प्रदान गरेको छ ।