लहान प्रादेशिक अस्पतालमा एन्टि रेबिज खोपको अभाव

जनस्वास्थ्य सरोकार, सिरहा । प्रादेशिक अस्पताल लहानमा एन्टि रेबिज खोपको अभाव भएको छ । अस्पतालमा खोप नहुँदा बिरामीहरू रित्तै घर फर्कन बाध्य भएका छन् ।
एन्टी रेबिज खोप सरकारी अस्पतालमा निःशुल्क पाइन्छ तर यहाँ प्रादेशिक अस्पतालमा खोप नहुँदा बिरामीहरू महंगोमा निजीमा किन्न बाध्य छन् । निजी पसल तथा क्लिनिकले एउटा खोप २ हजार रुपैयामा बेच्ने गरेका छन् ।
प्रदेशबाट आपूर्ति हुन नसक्दा खोप अभाव भएको अस्पतालका मेडिकल सुपरिडेन्टेन्ट डा. सुनील कुमार कुहवाहाले बताउनुभयो । यहाँ दैनिक १५÷२० जना बिरामी आउँछन् ।
खोप लगाउन २ सय भन्दा बढी बिरामी रहेको अस्पतालले जनाएको छ । ‘लक्षण अनुसार ३ देखि ५ डोजसम्म खोप लगाउनुपर्छ’, उहाँले भन्नुभयो ।