हेटौँडा अस्पतालमा कार्यरत चिकित्सकहरूले बुझाए सामूहिक राजीनामा पत्र

जनस्वास्थ्य सरोकार, मकवानपुर । हेटौँडा अस्पतालमा कार्यरत चिकित्सकहरूले सामूहिक राजीनामा पत्र तयार गरेका छन् ।

अस्पतालका विभिन्न विभागमा कार्यरत  ७८ जना चिकित्सकहरुले कुटपिट घटनामा संलग्नलाई कडा कारबाहीको माग गर्दै सामूहिक राजीनामा पत्रमा हस्ताक्षर गरी मेडिकल सुपरिटेन्डेन्ट डा. रामचन्द्र सापकोटालाई बुझाएका छन् ।

सुरक्षाको प्रत्याभूति नभएकाले उपचार सेवा प्रवाह गर्न नसक्ने उक्त पत्रमा उल्लेख गरिएको छ । अस्पताल भित्रै प्रवेश गरेर उपचारमा खटिएका डाक्टर माथि आक्रमण गर्ने र कारवाहीका लागि प्रहरी प्रशासनले देखाएको आनाकानी विरुद्ध सामूहिक रूपमा राजीनामा दिनुपर्ने बाध्यता देखिएको एक चिकित्कसले जानकारी दिनुभयो ।

उहाँका अनुसार हेटौँडा अस्पतालका मेसु डा. सापकोटा मार्फत हस्ताक्षर प्रमुख जिल्ला अधिकारी समक्ष बुझाउने तयारी छ ।

यद्यपि सो पत्र अझैसम्म प्रमुख जिल्ला अधिकार समक्ष नपठाएको मेसु सापकोटाले जानकारी दिनुभयो । समय र परिस्थिति अनुसार राजीनामा पत्र प्रमुख जिल्ला अधिकारीलाई बुझाइने उहाँको भनाइ छ।