केएमसीका आवासीय चिकित्सक सडकमा उत्रिए, अस्पतालले बल प्रयोग गर्न खोज्दा झडप

जनस्वास्थ्य सरोकार, काठमाडौँ । सिनामंगलस्थित काठमाडौं मेडिकल कलेज (केएमसी)का आवासीय चिकित्सक आन्दोलनमा उत्रिएका छन् ।

काठमाडौं विश्वविद्यालय (केयू) ले आवासीय चिकित्सक डा. विशद दाहालको निलम्बन स्थगन गरेपनि केएमसीले डा. दाहाललाई कलेज प्रवेशमा अझै रोक लगाएपछि आवासीय चिकित्सकहरु नाराबाजी गर्दै सडकमा उत्रिएका हुन् ।

डा. दाहाललाई केएमसी परिसर भित्र छिर्न खोज्दा मुल गेटमा रहेका अस्पतालका सुरक्षाकर्मीले रोकेका थिए । सो क्रममा आवासीय चिकित्सक र सुरक्षाकर्मीबीच सामान्य झडप भएको थियो ।

‘‘भित्र छिर्न खोज्दा सामान्य झडपको अवस्था बन्यो । अहिले हामी सडकमा आन्दोलन गरिरहेका छौँ,’–डा. दाहालले भन्नुभयो ।

कलेज प्रशासनले एक विज्ञप्तिमार्फत डा. दाहाललाई एक महिनाका लागि निलम्बन गरेको जनाएको थियो । तर केयुले भने डा. दाहालको निलम्बन स्थगन गर्दै ३ दिनभित्रमा कलेजको राय पेश गर्न भन्दै पत्रचार गरेको थियो ।

उक्त राय प्राप्त भएपछि निलम्बन कार्यान्वयन गर्नुपर्ने वा नपर्ने निर्णय लिन उपयुक्त हुने भन्दै केयूले हाललाई डा. दाहाललाई निलम्बन स्थगित गर्न भनेको छ ।

निलम्बनको विरोधमा डा. दाहालसहित पीजी तह पहिलो र दोस्रो वर्षका झन्डै ८० आवासीय चिकित्सक आन्दोलित छन् ।