द्वारिकाज होटलकी सञ्चालक अम्बिका श्रेष्ठको ९२ वर्षको उमेरमा निधन

नेपाल हेल्थ न्युज, काठमाडौँ । काठमाडौंको बत्तीसपुतलीमा रहेको हेरिटेज होटल द्वारिकाजकी सञ्चालक अम्बिका श्रेष्ठको निधन भएको छ।

श्रेष्ठको ९२ वर्षको उमेरमा ललितपुरस्थित मेडिसिटी हस्पिटलमा निधन भएको पारिवारिक स्रोतले जनाएको छ। निमोनियाबाट पीडित श्रेष्ठ दुई महिनायता उपचाररत हुनुहुन्थ्यो ।

उहाँ १ छोरी र २ नातिसँगै बस्दै आउनुभएको थियो । श्रीमान् द्वारिकादास श्रेष्ठको सपना पूरा गर्न उहाँले द्वारिकाज होटल सञ्चालनमा ल्याउनुभएको थियो ।

सन् १९६४ बाटै भवन निर्माण गर्न थाले पनि सन् १९७७ मा द्वारिकाज होटल दर्ता गराउनुभएको थियो । उहाँ गोर्खा दक्षिणबाहु चौथो, त्रिशक्तिपट्ट, स्पेनबाट गोल्डेन माइक लगायतका पदकबाट सम्मानित समेत हुनुभएको थियो ।