कोलकत्तामा महिला डाक्टरको बलात्कार र हत्याः टुटेको ब्लुटुथ इयरफोनले कसरी पुर्यायो अभियूक्तसम्म…

नेपाल हेल्थ न्युज, काठमाडौँ । पश्चिम बंगालको कोलकत्ताको एक अस्पतालमा महिला डाक्टरको बलात्कारपछि हत्या गरेको आरोपमा प्रहरीले एक आरोपीलाई पक्राउ गरेको छ ।

कोलकत्ता प्रहरीका अनुसार अभियुक्त घटनापछि आफ्नो घर गएर लुगा धोएर सुतेका थिए । प्रहरीका अनुसार अभियुक्तको अस्पतालसँग प्रत्यक्ष सम्बन्ध नभए पनि अस्पतालमा आउने–जाने गर्थे । उनी कोलकत्ता प्रहरीमा काम गर्ने स्वयंसेवक हुन् । आवश्यक पर्दा प्रहरीलाई सहयोग गर्थे ।

सेमिनार हलमा भेटियो चिकित्सकको शव
मेडिकल कलेजमा अध्ययनरत महिला डाक्टरको शव शुक्रबार बिहान सेमिनार हलमा फेला परेको थियो । उनी राति खाना खाएर सेमिनार हलम सुतेकी थिइन ।

बलात्कार र हत्याको घटना राति ३ बजेदेखि बिहान ६ बजेको बीचमा भएको प्रहरीले जनाएको छ । समाचार एजेन्सी पीटीआईले एक प्रहरी अधिकारीलाई उद्धृत गर्दै घटनास्थलमा फेला परेका प्रमाणका हेर्दा महिला डाक्टरको हत्या पश्चात बलात्कार गरिएको संकेत गर्ने बताएको छ ।

घटनापछि अस्पतालका चिकित्सक तथा स्वास्थ्यकर्मी आन्दोलनमा उत्रिएका छन् । यसैबिच कोलकत्ता आरजी कार मेडिकल कलेज तथा अस्पतालका प्रिन्सिपल डा. सन्दीप घोषले राजीनामा दिएका छन् । चिकित्सा शिक्षा विभागका एक अधिकारीले बीबीसीलाई भने–‘सामाजिक सञ्जालमा भएको बदनामी र आफ्नी छोरी मान्ने डाक्टरको मृत्युका कारण उनले यो निर्णय लिएका हुन्।’

आइतवार कोलकत्ता पुलिस कमिश्नर विनीत गोयलले पोस्टमार्टम रिपोर्ट परिवारलाई बुझाइसकेको र लापरवाही गरेको भन्दै सो क्षेत्रमा तैनाथ एक सहायक प्रहरी अधिकृतलाई हटाइएको बताए ।

यसैबीच अस्पताल प्रशासनले कर्तव्यमा लापरवाही गरेको भन्दै दुईजना सुरक्षाकर्मीलाई पनि हटाएको छ । दुवै जना अस्पतालमा करारमा कार्यरत थिए ।

सुरुमा प्रहरीले यो घटनालाई हत्याको मुद्दा माने पनि परिवारको आग्रहमा जबरजस्ती करणीको मुद्दा पनि थपेको छ ।

कसरी पक्राउ परे आरोपी ?
प्रहरीले घटनाको अनुसन्धान गर्न एसआईटी गठन गरेको थियो । अनुसन्धान सुरु भएको ६ घण्टाभित्रै आरोपीलाई पक्राउ गरिएको प्रहरीले जनाएको छ ।

प्रहरीले सीसीटीभी फुटेज बाहेक घटनास्थलबाट केही प्रमाणहरू पनि सङ्कलन गरे । घटनास्थलबाट सङ्कलन गरेको प्रमाणको सहयोगमा प्रहरीले अभियुक्तसम्म पुग्यो । प्रहरीले सेमिनार हलमा टुटेको ब्लुटुथ इयरफोन फेला पारेको थियो । जुन अभियुक्त फोनसँग कनेक्ट भएको थियो ।

यसबाहेक सीसीटीभी फुटेजमा अभियुक्त बिहान ४ बजे अस्पतालको आकस्मिक भवनमा प्रवेश गरेको पनि देखाइएको छ । यस समयमा आरोपीले इयरफोन लगाएका थिए । करिब ४० मिनेटपछि अस्पतालबाट बाहिर निस्कँदा उनको कानमा इयरफोन थिएन ।

अभियुक्तले कोलकत्ता प्रहरीमा नागरिक स्वयंसेवकको रूपमा काम गरेका थिए । उनी धेरै पटक अस्पतालबाहिर प्रहरी चौकीमा तैनाथ समेत भइसकेका थिए ।

अभियुक्त २०१९ मा मा नागरिक स्वयंसेवक बनेका थिए । त्यसयता उनी कोलकाता पुलिसमा संलग्न थिए । अस्पताल नजिकैको पोस्टिङ भएका कारण अभियुक्तको अस्पतालमा चिनजान थियो । प्रहरीले दोषीलाई कडा भन्दा कडा सजाय दिने प्रयास गरिने जनाएको छ ।

तर, अभियुक्त पक्राउ परेपनि आन्तदोलनरत चिकित्सकको आक्रोश शान्त भएको छैन । शुक्रबारदेखि नै चिकित्सकहरुले अस्पताल परिसरमा आन्दोलन गरिरहेका छन् । अस्पताल परिसरभित्रै डाक्टरको बलात्कार र हत्याको यो घटनाले महिलाको सुरक्षामा पनि प्रश्न उठाएको छ ।

यसै क्रममा पश्चिम बंगालकी मुख्यमन्त्री ममता बनर्जीले आफू मृत्युदण्डको विरुद्ध भएपनि यस मामिलामा दोषीलाई मृत्युदण्ड दिने पक्षमा रहेको बयान दिएकी छिन् ।

आन्दोलनमा उत्रिए स्वास्थ्यकर्मी
आरजी कार मेडिकल कलेज पश्चिम बंगालको सबैभन्दा ठूलो अस्पताल हो । २६ एकडमा फैलिएको यस अस्पतालमा १२ सय शय्या छन् । ओपिडीमा दैनिक औसत २५ सय बिरामी आउँछन् । यसबाहेक आपतकालीन विभागमा पनि दैनिक एक हजारभन्दा बढी बिरामी आउने गरेका छन् ।

उक्त घटनापछि आवासीय चिकित्सक महासंघले सोमबार देशभरका अत्यावश्यक बाहेकका स्वास्थ्य सेवा बन्द गर्ने घोषणा गरेका छन् ।

दिल्लीका सरकारी अस्पतालहरूले पनि सोमबारदेखि अनिश्चितकालीन हडतालको घोषणा गरेका छन् । धेरै अस्पतालले जारी गरेको विज्ञप्तिमा सोमबारदेखि ओपीडी, अपरेशन थिएटर र वार्ड ड्युटी बन्द हुने जानकारी दिएका छन् । बीबीसी