शहीद गंगालाल राष्ट्रिय हृदय केन्द्रको सदस्यमा क्यान्सरको डाक्टर !

नेपाल हेल्थ न्युज, काठमाडौं । वरिष्ठ क्यान्सर रोग विशेषज्ञ डा. राजेन्द्रप्रसाद बराल शहीद गंगालाल राष्ट्रिय हृदय केन्द्रमा सञ्चालक समिति सदस्यमा नियुक्त हुनुभएको छ । उहाँसँगै भोजपुरका समाजसेवी भनिएका दीपकराज सापकोटालाई पनि केन्द्रको सञ्चालक समितिमा नियुक्त गरिएको छ । पुष १ गतेको मन्त्रीपरिषद् बैठकले डा. बराल र सापकोटालाई केन्द्रको सञ्चालक समिति सदस्यमा नियुक्त गरेको हो ।

केन्द्रको सदस्यमा नियुक्त भएपछि नेपाल हेल्थ न्युजसँग प्रतिक्रिया दिँदै डा. बरालले भन्नुभयो—‘म क्यान्सर उपचारमा बिजी मान्छे । मन्त्री जीले नै रिक्वेष्ट गरेपछि मैले नाइँ भन्न सकिनँ ।’

उहाँले थप्नुभयो—‘प्रशासन डाइरेक्टर पनि भइसकेको हुनाले अलिकति आइडिया छ नि त । त्यही हिसाबले होला ।’
सञ्चालक समितिमा कति जना सदस्य हुन्छन् भन्ने प्रश्नमा डा. बरालले अनभिज्ञता व्यक्त गर्नुभयो । उहाँले भन्नुभयो—‘यसबारे मलाई केही पनि थाहा छैन ।’
यहाँ क्यान्सर विशेषज्ञ भएकाले मुटुसम्बन्धि अस्पतालमा त अन्यौल होला नि भन्ने प्रश्नमा डा. बरालले भन्नुभयो—‘त्यहाँ मैले उपचार गर्ने त होइन नि । बोर्ड सदस्यमा बसेर गंगालाललाई माथि लाने हो । म रोटरीमा पनि भएकाले रोटरीको पनि सहयोग माग्छन् उनीहरुले । त्यसैबाट सहयोग गर्नुपर्ला । पहिला रोटरीले ४० लाख मूल्य बराबरको सामान सहयोग गरेको थियो ।’
डा. बराल विगत ३० वर्षभन्दा बढी समयदेखि क्यान्सरको उपचार गर्दै आउनुभएको छ । डा. बराल भक्तपुर क्यान्सर हस्पिटलको डाइरेक्टरसम्म हुनुभयो । उहाँले भक्तपुर क्यान्सर हस्पिटलमा २२ वर्षसम्म सेवा गर्नुभएको छ । हाल उहाँ विभिन्न निजी अस्पतालहरुमा अभ्यासरत हुनुहुन्छ ।

शहीद गंगालाल राष्ट्रिय हृदय केन्द्रमा १२ जना सञ्चालक समिति सदस्य रहने व्यवस्था छ । केन्द्रमा स्वास्थ्य मन्त्री अध्यक्ष हुने व्यवस्था छ ।