३० वर्ष माथिका महिलालाई पाठेघरको मुखको क्यान्सर स्क्रिनिङ्ग गर्न स्वास्थ्य मन्त्रीको अपिल

नेपाल हेल्थ न्युज, काठमाडौँ । स्वास्थ्य तथा जनसङ्ख्या मन्त्री प्रदीप पौडेलले पाठेघरको मुखको क्यान्सर परीक्षण (स्क्रिनिङ्ग) गर्न अपिल गर्नुभएको छ ।

मन्त्री पौडेलले सोमबार भिडियो सन्देश जारी गर्नुहुँदै पाठेघरको मुखको क्यान्सर परीक्षण गर्न ३० वर्ष माथिका महिलालाई अपिल गर्नुभएको हो ।

सरकारले फागुन महिनाभरी नसर्ने रोगको पहिचान गर्ने अभियान सञ्चालन गरिरहेको छ । यो वर्ष पाँच लाख महिलाको पाठेघरको मुखको परीक्षण गर्ने सरकारको लक्ष्य छ ।

पाठेघरको मुखको क्यान्सरबाट बच्न जनचेतना अभिवृद्धि गरी समयमा नै यो रोगको पहिचान गर्ने यस अभियान सफल बनाउन सबै जनप्रतिनिधी, समाजसेवी, सञ्चारकर्मी, महिला सामुदायिक स्वास्थ्य स्वयंसेविका, स्वास्थ्यकर्मीलगायत सरोकारवाला सङ्घसंस्थाहरू सक्रियरूपमा संलग्न भई सहयोग गर्न मन्त्री पौडेलले अपिल गर्नुभएको हो ।

मन्त्री पौडेलले ३० वर्ष माथिका महिलालाई पाठेघरको मुखको परीक्षण गर्न तथा आ–आफ्नो घर परिवारका उक्त उमेर समूहका महिलालाई परीक्षणका लागि अभिप्रेरित गर्न अनुरोध गर्नु भएको छ ।

नेपालमा महिलामा हुने क्यान्सरहरू मध्ये महिलाको मृत्यु हुने प्रमुख कारण पाठेघरको मुखको क्यान्सर हो । समयमै पहिचान गरी उपचार गरेमा यो रोग निको हुने चिकित्सक बताउँछन् ।