सरकारले मेडिकल कलेज निर्माणका लागि ५६ करोड बजेट विनियोजन गर्यो

नेपाल हेल्थ न्युज, काठमाडौं । सरकारले निर्माणाधीन र प्रस्तावित मेडिकल कलेजहरूको पूर्वाधार निर्माणलाई प्राथमिकतामा राख्दै ५६ करोड रुपैयाँ बजेट विनियोजन गरेको छ।

बुधबार सङ्घीय संसद्को संयुक्त बैठकमा आगामी आर्थिक वर्ष २०८२/८३ का लागि बजेट भाषण प्रस्तुत गर्दै अर्थमन्त्री विष्णुप्रसाद पौडेलले बुटवल, सुर्खेत र डडेलधुरामा निर्माणाधीन तथा प्रस्तावित मेडिकल कलेजहरूको पूर्वाधार निर्माण कार्यलाई गति दिन ५६ करोड रुपैयाँ छुट्याइएको जानकारी दिनुभयो ।

“स्वास्थ्य सेवाको पहुँच बढाउन देशका विभिन्न भेगमा मेडिकल कलेजको पूर्वाधार निर्माणमा जोड दिइनेछ,” उहाँले भन्नुभयो, “यसका लागि बुटवल, सुर्खेत र डडेलधुरामा निर्माणाधीन कलेजलाई प्राथमिकता दिइएको छ।”

हालैका वर्षहरूमा मेडिकल शिक्षा विस्तारमार्फत स्थानीय तहसम्म विशेषज्ञ स्वास्थ्य सेवा पुर्‍याउने सरकारी योजनाअनुसार विभिन्न स्थानमा मेडिकल कलेज स्थापना र निर्माणको प्रक्रिया अघि बढाइएको छ। यसका लागि आवश्यक पूर्वाधार विकास, भवन निर्माण, उपकरण खरिद तथा जनशक्ति व्यवस्थापनमा खर्च हुने अनुमान गरिएको छ।

बुटवल, सुर्खेत र डडेलधुरा तीनै ठाउँमा मेडिकल कलेजको पूर्वाधार निर्माण कार्य विभिन्न चरणमा रहेको छ। बुटवलमा लुम्बिनी प्रदेश सरकारअन्तर्गतको मेडिकल कलेजको भवन निर्माण भइरहेका छन् भने, कर्णाली प्रदेशको सुर्खेत र सुदूरपश्चिम प्रदेशको डडेलधुरामा समेत मेडिकल कलेज निर्माणका लागि प्रारम्भिक संरचना निर्माण हुँदै आएका छन्।

स्वास्थ्य क्षेत्रमा राज्यको लगानी बढाउँदै स्थानीयस्तरमै विशेषज्ञ उपचार सुविधा दिने उद्देश्यले सरकारले मेडिकल कलेज स्थापना र सुदृढीकरणलाई बजेटमा प्राथमिकता दिएको हो।

सरकारको यो कदमले दूरदराजका क्षेत्रमा स्वास्थ्य शिक्षाको पहुँच बढाउनुका साथै स्थानीय बासिन्दालाई गुणस्तरीय स्वास्थ्य सेवा प्राप्त गर्ने अवसर मिल्ने अपेक्षा गरिएको छ।