गुरुको शल्यक्रिया, शिष्यका हातः आफ्नै विद्यार्थीबाट डा. वसन्त पन्तको शल्यक्रिया

नेपाल हेल्थ न्युज, काठमाडौं । वरिष्ठ न्यूरो सर्जन प्रा.डा. वसन्त पन्तका लागि २०८२ जेठ २९  गतेको दिन एउटा ऐतिहासिक मोड बन्यो । अन्नपूर्ण न्यूरोलोजिकल इन्स्टिच्युट एन्ड एलाइड साइन्सेजमा कार्यरत डा. पन्तको गर्धनको हड्डीमा रहेको तीन तहको ‘हर्निएटेड डिस्क’ को जटिल शल्यक्रिया सफलतापूर्वक सम्पन्न भयो ।

यो सर्जरीलाई विशेष बनाउने तत्व भनेको शल्यक्रिया गर्ने तीनै जना सर्जन—डा. सुदन ढकाल, डा. समीर आचार्य र डा. जनम श्रेष्ठ । उहाँहरु सबै डा. पन्तकै पूर्वविद्यार्थी हुनुहुन्छ ।

‘हिजो मेरो जीवनको एक ऐतिहासिक दिन रह्यो’— सामाजिक सञ्जालमार्फत आफ्ना अनुभूति बाँड्दै डा. पन्तले लेख्नुभएको छ—‘तीनजना प्रतिष्ठित स्नायु सर्जन, जो मेरा विद्यार्थी समेत हुन्, तिनैबाट म आफ्नो उपचार गराउँदै थिएँ । त्यो क्षण भावनात्मक पनि थियो, ऐतिहासिक पनि ।’

गुरुको परीक्षण: शिष्यको सफलता
न्यूरोसर्जरीजस्तो जटिल शल्यक्रिया सहज हुँदैन । गर्धनको ‘सर्भाइकल स्पाइन’ मा तीन तहमा ‘हर्निएटेड डिस्क’ देखिनु गम्भीर विषय हो, जसले अंग सुन्निनु, पीडा र शरीरको गतिशीलतामा प्रभाव पार्न सक्छ । त्यसैले सर्जरीलाई चुनौतीपूर्ण मानिएको थियो । तर तीन पूर्वविद्यार्थीहरूले गरेको सहकार्य र समर्पणले शल्यक्रिया सफल भयो ।
‘हाम्रो सबैका लागि हिजोको दिन एउटा ठूलो परीक्षा जस्तो अनुभव भयो’— डा. पन्तले लेख्नुभएको छ—र, म गर्वका साथ भन्न सक्छु, हामी सबैले त्यो परीक्षा पास गर्यौं ।’

आफ्नै विद्यार्थीहरूबाट उपचारको सन्तोष
आफ्नै विद्यार्थीहरूले उपचार गर्नु आफैंमा दुर्लभ अनुभव हो । डा. पन्तका लागि यो एउटा भावनात्मक सन्तोषको क्षण थियो । ‘आफ्नै देशमा, आफ्नै इन्स्टिच्युटमा, आफ्नै विद्यार्थीहरूबाट उपचार गरिनु—यो मेरो जीवनको सबैभन्दा ठूलो खुसी हो’— उहाँले भावुक शब्दमा लेख्नुभएको छ । 

अन्नपूर्ण परिवार र परिवारजनप्रति आभार
डा. पन्तले आफ्नो सफल शल्यक्रियामा सहयोग गर्ने सम्पूर्ण अन्नपूर्ण अस्पताल परिवार—एनेस्थेटिस्ट, नर्स र सहयोगी स्टाफहरूप्रति गहिरो आभार व्यक्त गर्नुभएको छ ।  साथै उपचारको दौरान निरन्तर साथ दिएकी जीवनसाथी विजया र सन्तानहरू जुन, रच्छिता, आकाश र निहारिकाप्रति विशेष धन्यवाद दिनुभएको छ । 

स्वास्थ्य लाभतर्फको यात्रा सुरु
शल्यक्रियापछि डा. पन्तले आफू निकै राम्रो महसुस गरिरहेको जनाएका जनाउनुभएको छ । उहाँले भन्नुभयो—‘ आज म निकै राम्रो महसुस गरिरहेको छु ।’ अब केही समय उहाँको ध्यान पूरै स्वास्थ्य लाभतर्फ केन्द्रित हुनेछ ।

नेपालको चिकित्सा क्षेत्रमा डा. वसन्त पन्तको योगदान उल्लेखनीय छ । आज उहाँ स्वयं बिरामीको भूमिकामा हुनुहुन्थ्यो, तर उपचार गर्ने हात उहाँसँगै सिकेका शिष्यका थिए । यो केवल शल्यक्रियाको सफलताको कथा मात्र होइन, यो गुरु र शिष्यबीचको गहिरो सम्बन्ध, शिक्षाको फल र नेपालमै विश्वस्तरीय स्वास्थ्य सेवा सम्भव छ भन्ने उदाहरण पनि हो ।