पाटन अस्पतालमा पहिलोपटक घाँटीमा प्वाल पारेर मस्तिष्क पक्षघातको सफल उपचार

नेपाल हेल्थ न्युज, ललितपुर। पाटन स्वास्थ्य विज्ञान प्रतिष्ठान (पाटन अस्पताल) मा नेपालमै पहिलोपटक न्युरो इन्टरभेन्सन प्रविधिबाट घाँटीमा प्वाल पारेर   मस्तिष्क पक्षघातको उपचार सफलतापूर्वक गरिएको छ।

यो प्रविधिबाट उपचार पाटन अस्पतालमा कार्यरत न्युरो इन्टरभेन्सनिस्ट डा. अरुण पौडेलको नेतृत्वमा गरिएको हो। डा. पौडेलका अनुसार केही दिनअघि एक पुरुष बिरामीको मस्तिष्क पक्षघात (ब्रेन स्ट्रोक) को उपचार गर्दा पहिलोपटक नेपालमै यस किसिमको प्रविधि प्रयोग गरिएको हो।

नेपालमा पहिलोपटक घाँटीबाट तार छिराएर मस्तिष्क पक्षघातको उपचार सफल भयो -डा. पौडेलले भन्नुभयो-यो न्युरो इन्टरभेन्सन नामक नयाँ प्रविधि हो जसमा टाउको चिर्नुपर्दैन।

न्युरो इन्टरभेन्सन विधिले परम्परागत ब्रेन सर्जरीको आवश्यकता हटाउने भएकाले बिरामीको पीडा कम हुने, अस्पताल बसाइ छोटिने र खर्च पनि घट्ने डा. पौडेलको भनाइ छ।उक्त प्रविधिमा घाँटीको नशाबाट माइक्रोक्याथेटर (सानो तार) छिराएर मस्तिष्कको अवरुद्ध रक्तनलीसम्म पुगिन्छ र त्यहाँ रहेका रगतका थेग्ला  (ब्लड क्लट) हटाइन्छन्। डा. पौडेलले बताएअनुसार यस्तो किसिमको उपचार मस्तिष्कमा अकस्मात रक्तसञ्चार बन्द भएर हुने इस्केमिक स्ट्रोकका बिरामीहरूलाई दिइन्छ।

कम घातक र द्रुत प्रभावकारी उपचार
'यसरी उपचार गर्दा टाउको चिर्नु नपर्ने भएकाले बिरामीलाई शारीरिक र मानसिक रूपमा ठूलो राहत मिल्छ'- उहाँले भन्नुभयो ।  साथै अस्पताल बसाइ घटेर खर्च पनि कम लाग्छ। हालसम्म यस्तो प्रविधि भारत, अमेरिका लगायतका मुलुकमा सामान्य रूपमा प्रयोग हुँदै आए पनि नेपालमा भने पहिलोपटक प्रयोग भएको हो। पाटन अस्पतालमा उक्त उपचार सफल भएपछि अस्पतालमा यस प्रविधिलाई नियमित सेवा रूपमा विस्तार गर्ने तयारी थालिएको छ।

नयाँ प्रविधि, नयाँ सम्भावना
नेपालमा हरेक वर्ष हजारौं मानिस मस्तिष्क पक्षघातबाट प्रभावित हुन्छन्। यस्ता बिरामीहरूको प्रभावकारी र कम पीडादायी उपचारका लागि न्युरो इन्टरभेन्सन प्रविधिले आशाको किरण देखाएको छ। डा. पौडेलको नेतृत्वमा भएको यो सफल उपचारले पाटन अस्पताललाई न्युरो इन्टरभेन्सन प्रविधिको सम्भावित केन्द्रीय सेवा केन्द्रको रूपमा विकास गर्ने संकेत पनि गरेको छ। यस किसिमको प्रविधि देशभरका शिक्षण अस्पतालहरूमा विस्तार गर्न सके बिरामीहरूलाई विदेश जानुपर्ने बाध्यता कम हुने तथा समयमै जीवनरक्षा सम्भव हुने स्वास्थ्य विशेषज्ञहरूको भनाइ छ। नेपालको न्युरो सर्जरी तथा स्ट्रोक उपचारको क्षेत्रमा यो एक ऐतिहासिक र प्रगतिशील पाइला हो। सरकारी र निजीस्तरबाट आवश्यक पूर्वाधार, तालिम तथा प्रविधिको पहुँच विस्तार गर्न सके उपचार प्रणालीमा ठूलो रूपान्तरण सम्भव देखिन्छ।