आईभीएफ उपचारमा मानसिक सहारा बन्नु गर्वको कुरा हो

नेपाल हेल्थ न्युज, काठमाडौं । आधुनिक स्वास्थ्य सेवामा केवल औषधि वा प्रविधिले मात्र नभई भावनात्मक समर्थनले पनि ठूलो भूमिका खेल्दछ । क्रियटर्स आईभीएफ नेपालकी क्लिनिकल नर्स विना श्रेष्ठले यही अनुभूतिलाई आफ्नो पेशागत जीवनको केन्द्रमा राख्नुभएको छ ।

विगत तीन वर्षदेखि क्रियटर्स आईभीएफ नेपालमा कार्यरत विना भन्नुहुन्छ—‘मैले नर्सिङ अध्ययन त गरेकी थिएँ, तर आईभीएफ मेरो लागि नयाँ फिल्ड थियो ।’ सुरुमा अनभिज्ञ भए पनि अहिले उहाँले यस क्षेत्रमा आफूलाई आत्मसाथ गर्नुभएको छ ।

‘यहाँ काम गर्न पाउँदा एकदमै खुशी महसुस गरेकी छु,’ उहाँ भन्नुहुन्छ—‘यो उपचार प्रक्रियामा रहेका बिरामीहरू धेरैजसो तनाव र चिन्तामा हुने गर्छन् ।’

आईभीएफ उपचारमा आउने दम्पतीहरू शारीरिक मात्र होइन, मानसिक रुपमा पनि संवेदनशील अवस्थामा हुन्छन् । यस्तो अवस्थामा उनीहरुको मनोबल उठाउने काम नर्स जस्ता स्वास्थ्यकर्मीले गर्छन् ।

विना भन्नुहुन्छ—‘उहाँहरूलाई मेन्टल्ली र एमोस्नल्ली सहयोग गर्न पाउँदा मैले स्वास्थ्यकर्मीको जिम्मेवारी अझ गहिरोसँग बुझेकी छु । यस्तो संवेदनशील घडीमा बिरामीसँगको आत्मीयता बनाउँदा नर्सिङको वास्तविक भावना महसुस हुन्छ ।’ उहाँका लागि क्रियटर्स आईभीएफमा काम गर्नु केवल एक पेशा होइन, जीवनकै महत्वपूर्ण अनुभव हो । उहाँ भन्नुहुन्छ—‘यहाँ काम गर्न पाउनु मेरो लागि गर्वको कुरा हो ।’