औषधिको सुरक्षा र सटीकता सुनिश्चित गर्ने नायिका

नेपाल हेल्थ न्युज, काठमाडौं । स्वास्थ्य सेवामा सफल उपचार मात्र डाक्टर वा नर्सको कामले सम्भव हुँदैन । पर्दामा नदेखिने तर अति आवश्यक भूमिका पनि यति नै महत्वपूर्ण हुन्छन् । क्रियटर्स फार्मा प्रा.लिमा कार्यरत फार्मेसिस्ट सरोजा मुमी यस्तै एक उदाहरण हुनुहुन्छ जसको कामले उपचारको गुणस्तरमा प्रत्यक्ष असर पारिरहेको छ ।

बिफार्म अध्ययन गर्नुभएकी सरोजा  विगत तीन वर्षदेखि क्रियटर्स फार्मा प्रा.लि.मा कार्यरत हुनुहुन्छ । उहाँ बिरामीलाई डाक्टरको प्रेस्क्रिप्सनअनुसार औषधि वितरण मात्र होइन, उनीहरूले औषधि कसरी र कहिले सेवन गर्ने भन्ने कुरामा आवश्यक काउन्सिलिङ पनि गर्नुहुन्छ । उहाँ भन्नहुन्छ—‘हाम्रो स्पेसलाईजेसन हर्मोनल मेडिसिन र इन्जेक्सनमा केन्द्रित छ ।

आईभीएफ उपचारमा यस्ता औषधिको प्रयोग अत्यधिक हुन्छ जसले उपचारको नतिजालाई प्रत्यक्ष प्रभाव पार्छ । त्यसैले हामीले यस्ता औषधिको कोल्ड चेन स्टोरेज पनि कडाईका साथ मेन्टेन गर्नुपर्छ ।

’ औषधिको तापक्रम व्यवस्थापनदेखि सुरक्षित आपूर्ति सुनिश्चित गर्नेसम्मको जिम्मेवारी उहाँको टिमले सम्हालिरहेको छ ।

साथै क्रियटर्स आईभिएफ नेपालमा हुने विभिन्न प्रक्रिया र प्रोसीजरमा आवश्यक पर्ने हरेक प्रकारका मेडिकल सप्लाइ—जसमा सुई, इन्जेक्सन, क्याथेटर, एनेस्थेसिया सामग्री आदि पनि पर्दछन्—उपलब्ध गराउनु पनि टिमको जिम्मेवारी हो । आईभीएफ उपचार संवेदनशील र प्राविधिक रूपमा जटिल प्रक्रिया हो ।

त्यसमा प्रयोग हुने औषधिको गुणस्तर, भण्डारण, वितरण र सही प्रयोगको सुनिश्चितता नभइकन उपचार सफल हुने सम्भावना घट्छ । यस्ता चुनौतीबीच पनि सरोजा र उहाँको टिमले आफ्नो काममा कुनै सम्झौता नगरी, निष्ठा र सजगताको साथ आफ्नो जिम्मेवारी पूरा गरिरहेको छ ।

उहाँको योगदानले स्वास्थ्य सेवा प्रणालीमा औषधि व्यवस्थापनको महत्वलाई झनै बलियो बनाएको छ । उपचारको पर्दा पछाडि खटिरहेका यस्ता फार्मेसिस्टको सानो जस्तो देखिने तर अत्यन्तै महत्वपूर्ण योगदानलाई सलाम गर्नु हाम्रो कर्तव्य हुन आउँछ ।