चितवनमा १५ दिनमै २० जनामा डेङ्गु पुष्टि

नेपाल हेल्थ न्युज, चितवन । चितवनमा साउन महिनाको पहिलो १५ दिनमा २० जनामा डेङ्गु र ३२ जनामा स्क्रब टाइफसको संक्रमण पुष्टि भएको छ। जनस्वास्थ्य कार्यालय चितवनले जानकारी दिएअनुसार  डेङ्गु  संक्रमितमध्ये १४ जना चितवन जिल्लाका हुन् भने बाँकी अन्य जिल्लाबाट आएका हुन्। 

संक्रमितहरू भरतपुर, खैरहनी, रत्ननगर र कालिका नगरपालिकाका हुन्। डेङ्गु एडिस जातको लामखुट्टेको टोकाइबाट फैलिने रोग हो, जसले बिहान र साँझ टोक्ने गर्छ। यो रोगबाट बच्न सरसफाइमा ध्यान दिनु र पानी जम्न नदिनु मुख्य उपाय हो।

त्यस्तै, स्क्रब टाइफस संक्रमितमध्ये २३ जना चितवनका हुन्। यो रोग माइट नामक कीराको टोकाइबाट सर्छ, जुन प्रायः झाडी, खेतबारी र फोहोर ठाउँमा पाइन्छ।

स्क्रब टाइफसले उच्च ज्वरो, आँखाको रातोपन, झाडापखाला र शरीरमा रातो दाग ल्याउन सक्छ। रोगबाट जोगिन शरीर छोपिने लुगा लगाउने, जुत्ता प्रयोग गर्ने र भुइँमा नबस्ने सल्लाह जनस्वास्थ्य कार्यालयले दिएको छ।