एक साताभित्र व्यावसायिक योजना बुझाउन मातहत अस्पताल र निकायलाई स्वास्थ्य मन्त्रालयको निर्देशन

नेपाल हेल्थ न्युज, काठमाडौं । स्वास्थ्य तथा जनसंख्या मन्त्रालयले आफ्ना मातहत रहेका संघीय तहका सबै अस्पताल तथा स्वास्थ्य संस्थाहरूलाई सात दिनभित्र व्यावसायिक कार्य योजना तयार पारेर बुझाउन निर्देशन दिएको छ।

मन्त्रालयले यो निर्णय स्वास्थ्य संस्थाहरूको कार्यक्षमता अभिवृद्धि गर्ने, योजनाबद्ध रूपमा सेवा प्रवाहलाई अगाडि बढाउने र समयमा नै बजेट खर्च सुनिश्चित गर्ने लक्ष्यसहित लिएको हो। यस सम्बन्धमा मन्त्रालयले सम्बन्धित निकायहरूलाई परिपत्र जारी गरिसकेको छ।

प्राप्त कार्य योजनाको आधारमा मन्त्रालय र ती संस्थाहरूबीच कार्य सम्पादन सम्झौता  गर्ने तयारी समेत भइरहेको छ। यस्तो सम्झौताले स्वास्थ्य संस्थाहरूलाई थप उत्तरदायी बनाउने र सेवाको परिणाममूलकता सुनिश्चित गर्ने अपेक्षा राखिएको छ।

मन्त्रालयका प्रवक्ता डा. प्रकाश बुढाथोकीका अनुसार, हाम्रो मूल उद्देश्य भनेको स्वास्थ्य सेवा प्रणालीलाई गुणस्तरीय बनाउनु र प्रत्येक संस्थालाई आफ्नो लक्ष्यप्रति जिम्मेवार तुल्याउनु हो। कार्य सम्पादन सम्झौताबाट वार्षिक योजना र प्रगतिको स्पष्ट मूल्याङ्कन गर्न सजिलो हुनेछ।

विगतमा विभिन्न स्वास्थ्य कार्यक्रमहरू बजेटमा समावेश भए पनि कार्यान्वयनको चरणमा पुग्न नसकेको र बजेट फिर्ता जानु परेको गुनासो भइरहने गरेको पृष्ठभूमिमा मन्त्रालयले चालु आर्थिक वर्षको सुरुवातमै यस्तो सक्रियता देखाएको हो। महालेखा परीक्षकको प्रतिवेदनहरूमा पनि बारम्बार यस्ता समस्याहरू औँल्याइएका छन्।

स्वास्थ्य संस्थाको स्थापना र सञ्चालनसम्बन्धी २०७० सालको निर्देशिकामा व्यावसायिक योजना आवश्यक हुने उल्लेख भए पनि हालसम्म सबै संघीय संस्थालाई एकैचोटि योजना पेश गर्न निर्देशन दिएको यो पहिलोपटक हो, मन्त्रालयका एक उच्च अधिकारीले जानकारी दिनुभयो।

यसअघि अन्य सरकारी निकायमा कार्य सम्पादन सम्झौताको अभ्यास भए पनि स्वास्थ्य क्षेत्रमै यसलाई अब प्रभावकारी रूपमा लागू गर्न लागिएको मन्त्रालयको भनाइ छ। मन्त्रालयको विश्वास छ, यस उपायले स्रोत साधनको अधिकतम उपयोग र विशिष्ट सेवाको विस्तार सहज बनाउनेछ।