स्वास्थ्य क्षेत्रमा राजनीतिक हस्तक्षेप विरुद्ध जेनजी डक्टर्सको सातबुँदे माग

नेपाल हेल्थ न्युज, काठमाडौं । स्वास्थ्य क्षेत्रमा बढ्दो राजनीतिक हस्तक्षेप र दलगत भागबण्डाविरुद्ध आवाज उठाउँदै जेनजी डक्टर्स एशोसिएसनले सातबुँदे माग सार्वजनिक गरेको छ।

एक विज्ञप्ति मार्फत एशोसिएसनले मुलुकका अस्पताल र मेडिकल कलेजहरू जनताको ज्यान जोगाउने जिम्मेवारीमा रहने संवेदनशील संस्था भए पनि आज राजनीतिक स्वार्थ र भागबण्डाको अखडा बन्न थालेको भन्दै गम्भीर आपत्ति जनाएको छ।

विज्ञप्तिमा योग्यता र दक्षता बेवास्ता गरी गरिएका राजनीतिक नियुक्तिहरूका कारण चिकित्सा शिक्षा र स्वास्थ्य सेवा प्रणाली गम्भीर संकटमा परेको उल्लेख छ।

जेनजी डक्टर्स एशोसिएसनको सातबुँदे माग यसप्रकार छन्ः

१) योग्यता र दक्षता मिचेर गरिएको सबै राजनीतिक नियुक्तिहरू तत्काल राजीनामा दिनुहोस्।

२) स्वास्थ्य मन्त्रीको नियुक्ति स्वास्थ्य क्षेत्र तथा मेडिकल समुदाय (फ्रेटर्निटी) बाट गरियोस्।

३) नेपाल मेडिकल काउन्सिल र नेपाल मेडिकल एसोसिएसनलाई राजनीतिक दलहरूको प्रभावबाट स्वतन्त्र गरियोस्।

४) राजनीतिक दलसँग आबद्ध सम्पूर्ण चिकित्सक संगठनहरू तुरुन्त विघटन गरियोस्।

५) नियुक्ति प्रक्रिया योग्यता र पारदर्शितामा आधारित बनाइयोस्।

६) स्वास्थ्य क्षेत्रलाई ‘राजनीति(मुक्त क्षेत्र’ घोषणा गरियोस्।

७) स्वास्थ्यकर्मीका लागि सुरक्षित कार्यस्थल सुनिश्चित गर्न गठित संघर्ष समितिसँग भएका सहमति तथा प्रतिवेदनहरूको पूर्ण कार्यान्वयन गरियोस्।