स्वास्थ्य मन्त्रालयले कर्मचारी सरुवा र प्रशासनिक प्रक्रिया स्थगित गर्ने निर्णय

नेपाल हेल्थ न्युज, काठमाडौं । स्वास्थ्य तथा जनसंख्या मन्त्रालयले कर्मचारी सरुवा, काज तथा कामकाजसँग सम्बन्धित सबै प्रकारका प्रशासनिक प्रक्रिया हाललाई रोक्ने निर्णय गरेको छ।

मन्त्रालयले दिएको जानकारी अनुसार, हालै भदौ २३ र २४ गतेका दिन भएको प्रदर्शनको क्रममा मन्त्रालय भवनमा आगलागी हुँदा संरचना र कागजातहरू पूर्णरूपमा नष्ट भएकाले यस्तो कदम चालिएको हो।

आगोले पुराना अभिलेखहरु जलेर नष्ट भएका कारण हाललाई अत्यावश्यक सेवा बाहेक अन्य प्रशासनिक कामहरू अर्को सूचना नभएसम्मका लागि अगाडि नबढाइने मन्त्रालयले स्पष्ट पारेको छ।

यस निर्णयका कारण सेवाग्राहीलाई पर्न सक्ने असुविधाप्रति मन्त्रालयले क्षमायाचना पनि व्यक्त गरेको छ। मन्त्रालयका शाखा अधिकृत अपिल पन्तद्वारा यो सूचना जारी गरिएको हो।