महंगी भत्ता माग्दै करार स्वास्थ्यकर्मी आन्दोलित

नेपाल हेल्थ न्युज, धनगढी । सेती प्रादेशिक अस्पतालमा कार्यरत करार सेवाका स्वास्थ्यकर्मीहरू चाडपर्व खर्च, पोशाक भत्ता र महंगी भत्ता नपाएपछि आन्दोलित भएका छन्।

स्वास्थ्यकर्मीहरूले सामाजिक विकास मन्त्रालयको मुख्य कार्यालय घेराउ गर्दै आफ्नो माग पूरा गर्न दबाब दिएका छन्। उनीहरूले भत्ता नपाएसम्म काम नगर्ने चेतावनीसमेत दिएका छन्।

अस्पतालका मेडिकल सुपरिन्टेन्डेन्ट डा. हेमराज पाण्डेले भनेका छन् कि सामाजिक विकास मन्त्रालयले नियुक्त गरेका करार कर्मचारीलाई अस्पतालले भत्ता दिन सक्दैन। मन्त्रालयबाट मात्र तलब र भत्ता उपलब्ध गराउनुपर्ने व्यवस्था भएकोले भत्ता दिन समस्या आएको उनले जानकारी दिए।

हाल १५० भन्दा बढी करार सेवामा कार्यरत कर्मचारीले चाडपर्व खर्च, महंगी भत्ता र पोशाक भत्ता पाएका छैनन्। उनीहरूले असोज ६ गतेदेखि भत्ता पाउनुपर्ने माग राख्दै आन्दोलनमा उत्रिएको बताएका छन्।

अस्पताल विकास समितिले अघिल्लो वर्षसम्म चाडपर्व खर्च उपलब्ध गराए पनि यस वर्ष भने उपलब्ध गराइएको छैन।

सेती प्रादेशिक अस्पतालले सामाजिक विकास मन्त्रालयबाट मात्र १२ महिनाको तलब अनुदान प्राप्त गरेको बताउँदै, महालेखा परीक्षकको प्रतिवेदन अनुसार करार सेवामा महंगी भत्ता र पोशाक भत्ता दिन नहुने हुँदा समस्या उत्पन्न भएको बताएको छ।

अस्पताल प्रशासनले भत्ता दिन नपाए पनि चाडपर्व खर्च दिन सकिने भए पनि यसमा पनि नीति र कानुनी प्रतिबन्ध रहेको जनाएको छ। स्वास्थ्यकर्मीहरू र सम्बन्धित निकायबीच छलफल भइरहेको भए पनि अहिलेसम्म समस्या समाधान हुन सकेको छैन।