क्रिकेट मैदानमा डा. इशान पाण्डेको धमाकेदार प्रदर्शन

नेपाल हेल्थ न्युज, काठमाडौं । नेपाली क्रिकेट र स्वास्थ्य क्षेत्रमा सक्रिय इशान पाण्डेले हिजो नेपाल प्रिमियर लिग-२ (एनपीएल) मा उत्कृष्ट प्रदर्शन गर्दै आफ्नो टोली सुदूरपश्चिमलाई जनकपुर बोल्टविरुद्ध शानदार जित दिलाए।

उनले मात्र ३५ बल खेल्दै ५६ रन बनाए र ‘प्लेयर अफ द म्याच’को अवार्ड पनि हात पारे। यस उत्कृष्ट प्रदर्शनका लागि पाण्डेलाई ५० हजार रुपैयाँ नगद पुरस्कार प्रदान गरिएको थियो।

पाण्डे केवल क्रिकेटर मात्र होइनन्, उनी पेशाले एमबीबीएस डाक्टर पनि हुन्। हाल धुलिखेल अस्पतालमा कार्यरत उनी, खेलबाट फुर्सद मिल्ने बित्तिकै बिरामीको सेवा गर्न पुनः अस्पताल फर्किन्छन्।

क्रिकेट मैदान र स्वास्थ्य सेवामा समान रूपमा सक्रिय रहँदै, पाण्डेले युवाहरूलाई प्रेरणा दिएका छन् कि पेशागत जीवन र रुचि दुवै क्षेत्रमा उत्कर्ष हासिल गर्न सकिन्छ।