नेपालमा डेंगी संक्रमित ८ हजार नाघ्यो

नेपाल हेल्थ न्युज, काठमाडौं । देशभर डेंगी संक्रमितको संख्या ८ हजार नाघेको तथ्यांक सार्वजनिक भएको छ। इपिडेमियोलोजी तथा रोग नियन्त्रण महाशाखा  ‘ईडीसीडी’ को तथ्याङ्कअनुसार गत पुस महिनादेखि हालसम्म ८ हजार १ सय ९ जनामा डेंगी पुष्टि भएको जनाएको हो।

महाशाखाका अनुसार सबैभन्दा धेरै संक्रमित बाग्मती प्रदेशमा २ हजार १ सय ४ जना फेला परेका छन्। त्यसपछि गण्डकी प्रदेशमा २हजार ६२, लुम्बिनीमा १ हजार३ सय २७, कोशीमा १ हजार २७, सुदूरपश्चिममा ८ सय ५९, कर्णालीमा ५ सय २६ तथा मधेश प्रदेशमा २ सय ४ जनामा संक्रमण देखिएको छ।

पछिल्लो २४ घण्टामा ६ जना नयाँ संक्रमित फेला परेका छन् भने गत एक सातामा ५६ जनामा डेंगी पुष्टि भएको छ। अहिलेसम्म ६ जनाको मृत्यु भएको रिपोर्ट महाशाखाले दिएको छ।

यस वर्ष डेंगी संक्रमण ७६ जिल्लामा देखिएको छ। देशभरका अधिकांश जिल्लामा संक्रमण देखिए पनि डोल्पामा मात्र अहिलेसम्म केस पुष्टि भएको छैन।