नेपाल चिकित्सक संघको केन्द्रीय कार्यकारिणी निर्वाचनको प्रथम नामावली सार्वजनिक

नेपाल हेल्थ न्युज, काठमाडौं । नेपाल चिकित्सक संघ (एनएमए) को केन्द्रीय कार्यकारिणी समितिको आगामी निर्वाचनका लागि उम्मेदवारी दिएका उम्मेदवारहरूको प्रथम नामावली सार्वजनिक गरिएको छ।

संघका अनुसार मिति २०८२ मंसिर २ गते बुधबार दर्ता भएका उम्मेदवारहरूको मनोनयन पत्र छानबिन पश्चात अध्यक्ष १, वरिष्ठ उपाध्यक्ष १, उपाध्यक्ष ७ (प्रत्येक प्रदेशबाट १/१ जना प्रादेशिक संयोजकसहित), महासचिव १, कोषाध्यक्ष १, सहसचिव १, सह–कोषाध्यक्ष १ तथा सदस्य ६ गरी जम्मा १९ पदका लागि प्रथम नामावली सार्वजनिक गरिएको हो।

निर्वाचन समितिले पूर्वनिर्धारित निर्वाचन कार्यतालिका अनुसार उम्मेदवारहरूको मनोनयन उपर दाबी–विरोध गर्न चाहनेले मिति २०८२ मंसिर ४ गते शुक्रबार बिहान १० बजेदेखि दिउँसो २ बजेसम्म संघको केन्द्रीय कार्यालय, प्रदर्शनीमार्गमा उपस्थित भई निवेदन दिन सक्ने जनाएको छ।

साथै, सो अवधिभित्र निर्वाचन समितिको इमेल [email protected] मार्फत पनि दाबी–विरोध पेश गर्न सकिने व्यवस्था गरिएको छ। नेपाल चिकित्सक संघले सम्पूर्ण सरोकारवालाहरूलाई यस सम्बन्धमा जानकारी गराएको छ।