एक अस्पतालसहित चार औषधि पसलमाथि कारबाही

नेपाल हेल्थ न्युज, जनकपुरधाम । सरकारले तोकेको मापदण्ड पालना नगरी दर्ता बिना सञ्चालनमा रहेका एक अस्पताल र चार औषधि पसलविरुद्ध कारबाही प्रक्रिया अघि बढाइएको छ ।

औषधि व्यवस्था विभागको वीरगञ्ज कार्यालयले जनकपुरधाम तथा धनुषाका विभिन्न स्थानमा गरेको अनुगमनका क्रममा नियमअनुसार सञ्चालनमा नरहेका स्वास्थ्य संस्थाहरू फेला परेपछि ती स्थानमा सिलबन्दी गरी सबै कारोबार रोकिएको जनाएको छ ।

कार्यालय प्रमुख शम्भु साहका अनुसार जनकपुरधामको रामानन्द चौकस्थित जनकपुर सुरक्षा अस्पताल तथा फार्मेसी, बजरङ्ग चौकको प्रशान्त मेडिकल हल, माछा बजारको राघव सर्जिकल पसल र वीरेन्द्र बजारमा रहेको कम्युनिटी सर्भिस अस्पताललाई सिल गरिएको हो ।

अनुगमनका क्रममा निजी अस्पतालसहित करिब दुई दर्जन औषधि पसलको निरीक्षण गरिएको थियो । तीमध्ये ११ वटा औषधि पसलमा अनिवार्य रूपमा हुनुपर्ने फार्मासिस्ट नपाइएपछि तथा नियमविपरीत औषधि बिक्री गरिएको भेटिएपछि प्रारम्भिक चरणमा चेतावनी दिइएको कार्यालयले जनाएको छ ।