नेपाल चिकित्सक संघ चुनावका लागि टिम बद्रीको चुनावी प्रतिबद्धता सार्वजनिक

नेपाल हेल्थ न्युज, काठमाडौं । नेपाल चिकित्सक संघ (एनएमए) को आसन्न निर्वाचनका लागि डा. बद्री रिजाल नेतृत्वको समूहले चुनावी प्रतिबद्धता पत्र सार्वजनिक गरेको छ। ‘पेशागत मर्यादा र अटुट एकता’ नारासहित सार्वजनिक प्रतिबद्धतामा चिकित्सकको पेशागत सुरक्षा, पारिश्रमिक वृद्धि र दरबन्दी थप मुख्य प्राथमिकतामा छन्।

टिम बद्रीले पहिलो वर्षमै २१ सय र पाँच वर्षमा १० हजारभन्दा बढी चिकित्सक दरबन्दी थप्न सरकारलाई दबाब दिने जनाएको छ। अतिरिक्त समयको आम्दानीमा लाग्ने कर पुनरावलोकन, कार्यसम्पादनमा आधारित प्रोत्साहन भत्ता, स्वास्थ्यकर्मी सुरक्षा ऐनको प्रभावकारी कार्यान्वयन र उपचारसम्बन्धी कानुनी दफा संशोधनको विषय पनि समेटिएको छ।

चिकित्सकको मानसिक स्वास्थ्यका लागि वैज्ञानिक ड्यूटी आवर र वेलनेस कार्यक्रम, एनएमएलाई जिल्ला तहसम्म विस्तार र ‘एनएमए गुरुकुल सिरिज’ सुरु गर्ने प्रतिबद्धता जनाइएको छ। संघको निर्वाचन माघ २–३ गते उपत्यका बाहिर र माघ १५–१७ गते उपत्यकाभित्र हुने छ।