देउराली जनताको फड्कोः चितवनमा ४.७५ अर्बको अत्याधुनिक नयाँ कारखाना बनाउँदै

नेपाल हेल्थ न्युज, काठमाडौं । देउराली जनता फर्मास्यूटिकल्स प्रा.लि. (डीजेपीएल) ले औषधि उत्पादनमा विविधीकरण र क्षमता विस्तार गर्ने उद्देश्यसहित चितवनको भरतपुरमा अन्तर्राष्ट्रिय मापदण्डअनुसारको अत्याधुनिक नयाँ कारखाना निर्माण गर्ने भएको छ । उद्योगले यस परियोजनामा चार अर्ब ७५ करोड रुपैयाँ लगानी गर्ने जनाएको छ ।

कम्पनीको ३५औँ वार्षिकोत्सवका अवसरमा आयोजित कार्यक्रममा देउराली–जनताका कार्यकारी निर्देशक हरिभक्त शर्माले नयाँ कारखाना दुई वर्षभित्र सम्पन्न गर्ने लक्ष्य राखिएको जानकारी दिनुभयो । उहाँका अनुसार परियोजना पूरा भएपछि करिब ५५० जनाले प्रत्यक्ष रोजगारीको अवसर पाउनेछन् ।

कार्यकारी निर्देशक शर्माले विज्ञानमा आधारित गुणस्तर र सत्यनिष्ठालाई कम्पनीको मूल कार्यदिशा रहेको उल्लेख गर्दै औषधि उत्पादनमा आत्मनिर्भर बन्ने र विश्व बजारमा नेपाली औषधिको निर्यात सम्भावनालाई साकार पार्ने दिशामा कम्पनी निरन्तर अघि बढिरहेको जानकारी दिनुभयो । सो अवसरमा कम्पनिका निर्देशक द्धय सुरजभक्त पौडेल र आयुषभक्त पौडेलले कम्पनिको वृहत्तर विकासका लागि आफूहरु सक्रिय रुपमा लागिरहेको स्पष्ट पार्नुभयो ।

हाल देउराली–जनताले अत्याधुनिक प्रविधिको प्रयोग गर्दै क्याप्सुल, ट्याब्लेट, लिक्विड, ओइन्टमेन्ट र ड्राइ पाउडरलगायत २९६ प्रकारका जीवन रक्षक तथा दीर्घ रोग उपचारमा प्रयोग हुने औषधि उत्पादन गरिरहेको छ । उद्योगका अनुसार औषधि अनुसन्धान, उत्पादन र गुणस्तर परीक्षणका लागि अन्तर्राष्ट्रिय स्तरका प्रविधि र उपकरणसहितको सुविधा सम्पन्न कारखाना सञ्चालनमा छ ।

यस उद्योगले औषधि आयातमा रहेको निर्भरता घटाउँदै मुलुकलाई आत्मनिर्भर बनाउने दिशामा उल्लेखनीय योगदान पुर्याउँदै आएको जनाएको छ ।

कम्पनीका अनुसार नयाँ कारखाना सञ्चालनमा आएपछि उत्पादन विविधीकरण, गुणस्तर अभिवृद्धि र अन्तर्राष्ट्रिय बजारमा नेपाली औषधिको प्रतिस्पर्धात्मक क्षमता अझ सुदृढ हुने विश्वास लिइएको छ । परियोजना सफल बनाउन देउराली–जनताले नेपाल सरकार, सरोकारवाला निकाय र सञ्चारकर्मीहरूको सहयोग र सहकार्यको अपेक्षा गरेको छ । हाल कम्पनिको कारोबार एक वर्षमै कम्पनीको व्यापार ३२ करोड ७० लाख रुपैयाँले वृद्धि भएको छ । कम्पनिले गत वर्ष मात्र २ अर्ब ३५ करोडको कारोबार गरेको थियो ।