इरानका सर्वोच्च नेता खामेनीको निधन, ४० दिन राष्ट्रिय शोक घोषणा

नेपाल हेल्थ न्युज, काठमाडौं । आयतोल्लाह अली खामेनीको निधन भएको इरानको सरकारी टेलिभिजनले पुष्टि गरेको छ । उनको निधनमा ४० दिन राष्ट्रिय शोक तथा सात दिन सार्वजनिक बिदा घोषणा गरिएको जनाइएको छ ।

यसअघि डोनाल्ड ट्रम्पले सामाजिक सञ्जाल ट्रुथ सोसलमार्फत खामेनी मारिएको दाबी गरेका थिए । तर त्यसबेला इरानका विदेशमन्त्री अब्बास अराघचीले अमेरिकी सञ्चारमाध्यम एनबीसी सँगको कुराकानीमा खामेनी सुरक्षित रहेको बताएका थिए ।

पछि इरान राज्य टेलिभिजनका प्रस्तोताले भावुक हुँदै खामेनीको मृत्यु भएको घोषणा गरेका हुन् । तर इरान राज्यको टेलिभिजनका एक प्रस्तोताले भावुक हुँदै सर्वोच्च नेता खामेनीको मृत्यु भएको र ४० दिन शोकको घोषणा भएको जानकारी दिएको बीबीसीले जनाएको छ ।

अलजजिराका अनुसार इरानको फार्स न्युज एजेन्सीले पनि सर्वोच्च नेता खामेनी शनिबार नै मारिएको जनाएको छ । समाचारअनुसार खामेनी आफ्नो कार्यालयमा ‘आफूलाई तोकिएको जिम्मेवारी पूरा गरिरहँदा’ शनिबार बिहान सबेरै मारिएका थिए । 

८६ वर्षीय खामेनी सन् १९८९ देखि इरानका सर्वोच्च नेताका रूपमा कार्यरत थिए । उनले आयतुल्लाह रुहोल्लाह खोमेनीको निधनपछि नेतृत्व सम्हालेका हुन् । खोमेनीले सन् १९७९ को इस्लामिक क्रान्तिको नेतृत्व गर्दै शाह शासन अन्त्य गरेका थिए ।

सर्वोच्च नेताका रूपमा खामेनीसँग सरकार, सेना र न्यायपालिकामाथि अन्तिम अधिकार थियो । उनको कार्यकालमा अमेरिका र इजरायलसँगको तनाव उच्च रहँदै आएको थियो । पछिल्ला वर्षहरूमा इजरायली नेतृत्वले उनलाई हटाउने संकेतसमेत दिएको थियो ।