मृत दाताको गर्भाशयबाट बेलायतमा पहिलो पटक स्वस्थ शिशुको जन्म

नेपाल हेल्थ न्युज, लन्डन । बेलायतमा मृत दाताबाट प्रत्यारोपित गर्भाशय प्रयोग गरी पहिलो पटक शिशुको जन्म भएको छ । केन्टकी ग्रेस बेल नामकी महिलाले जन्माएको बालक ह्युगो अहिले १० हप्ताको भएका छन् ।

चिकित्सकहरूले यस उपलब्धिलाई ऐतिहासिक र मार्गप्रशस्त गर्ने क्षण भन्दै समान समस्याबाट पीडित महिलाका लागि नयाँ आशाको रूपमा वर्णन गरेका छन् ।

तीस वर्ष उमेर समूहकी बेल जन्मदेखि नै गर्भाशयविहीन थिइन्। यो अवस्था एमआरकेएच सिन्ड्रोमका कारण हुन्छ । यस अवस्थामा महिलामा सामान्य डिम्बाशय भए पनि गर्भाशय नहुने भएकाले स्वाभाविक रूपमा गर्भधारण सम्भव हुँदैन। बेललाई १६ वर्षकै उमेरमा आफूले आफ्नै गर्भबाट बच्चा जन्माउन नसक्ने जानकारी दिइएको थियो ।

बेल र उनका पार्टनर स्टिभ पावेलका लागि बच्चा पाउने विकल्प सरोगेसी वा गर्भाशय प्रत्यारोपण मात्र थियो । पछि मृत दाताबाट गर्भाशय उपलब्ध भएपछि चिकित्सक टोलीले सफल प्रत्यारोपण गरे । त्यसपछि बेलले प्राकृतिक रूपमा गर्भधारण गरी गत डिसेम्बरमा पश्चिम लन्डनस्थित क्विन चार्लोट्स एन्ड चेल्सी हस्पिटलमा करिब सात पाउन्ड तौलको शिशु जन्माइन् ।

बेलले दाता परिवारप्रति कृतज्ञता व्यक्त गर्दै यसलाई अविश्वसनीय उपहार बताएकी छन् । म हरेक दिन दाता र उनको परिवारलाई सम्झन्छु। उनकी छोरीले मलाई जीवनकै सबैभन्दा ठूलो उपहार दिएकी छिन, उनले भनिन् ।

विशेषज्ञहरूका अनुसार बेलायतमा करिब ५ हजार महिला एमआरकेएच सिन्ड्रोमबाट प्रभावित छन्। यस सफलताले भविष्यमा यस्ता महिलालाई आफ्नै गर्भबाट सन्तान जन्माउने सम्भावना अझ विस्तार हुने विश्वास गरिएको छ । चिकित्सक टोलीले यस प्रविधिलाई सुरक्षित र पहुँचयोग्य बनाउन थप अनुसन्धान जारी राखे जनाएको छ।