सर्ट भिडियोे हेर्ने बानीले एकाग्रता र धैर्यमा असर गर्छ: अध्ययन

नेपाल हेल्थ न्युज, काठमाडौं । आजकाल धेरै व्यक्तिहरू मोबाइलमा सर्ट भिडियो वा रिल्स हेर्न रमाउँछन्। तर, नयाँ अध्ययनले यस बानीले मस्तिष्क र ध्यान क्षमतामा नकारात्मक प्रभाव पार्न सक्ने देखाएको छ।

चीनको झेजियाङ विश्वविद्यालयका अनुसन्धानकर्ताहरूले ४८ स्वस्थ व्यक्तिहरूमा इलेक्ट्रोइन्सेफालोग्राम (ईईजी)को माध्यमबाट ध्यान परीक्षण गरे।

परिणामले देखाएको छ कि छोटो भिडियो हेर्ने बानी बढ्दै गएपछि व्यक्ति आफ्नो योजना बनाउन, ध्यान केन्द्रित गर्न र आवेग नियन्त्रण गर्न कठिनाई महसुस गर्न सक्छ।

भारतका क्लिनिकल साइकोलोजी विशेषज्ञ डा. मनोजकुमार शर्माले भने, “छोटो भिडियोहरूले मस्तिष्कलाई बारम्बार उत्तेजित गर्छन्, जसले वास्तविक काममा ध्यान दिन कठिन बनाउँछ। यसलाई नियन्त्रण नगरे समस्या देखिन सक्छ।”

अध्ययनले मोबाइलको सीमित प्रयोग, सुत्नुअघि स्क्रोल नगर्ने, र माइन्डफुलनेस जस्ता मानसिक अभ्यासहरू गर्न सल्लाह दिएको छ।