सेतो कोटदेखि संसदसम्म: स्वास्थ्यकर्मीहरू अब नीति निर्माता

नेपाल हेल्थ न्युज, काठमाडौं । नेपालमा सामान्यतया “डाक्टर” शब्दले अस्पतालको आपतकालीन कक्षमा दिन–रात खटिने चिकित्सकको छवि ल्याउँछ। तर पछिल्ला वर्षहरूमा केही डाक्टर र स्वास्थ्यकर्मीहरू स्वास्थ्य नीतिमा प्रत्यक्ष योगदान दिन  संसद पुगेका छन्।

यसपटक संघीय संसद्को प्रतिनिधिसभामा डा. लेखजंग थापा, डा. तोसिमा कार्की, आनन्दबहादुर चन्द, दीपककुमार साह, डा. शम्भुकुमार यादव र स्वास्थ्य स्वयंसेविका आशा झा सांसद बनेका छन्। सबै राष्ट्रिय स्वतन्त्र पार्टी (रास्वपा) बाट निर्वाचित भएका हुन्।

उनीहरू अस्पताल र स्वास्थ्य सेवाको वास्तविक अवस्था नजिकबाट चिनेका छन् – बेड र औषधि अभाव, ग्रामीण स्वास्थ्यकर्मीको कमी, र बिरामीको आर्थिक चुनौती बुझेका छन।

डा. लेखजंग थापा, रुपन्देही–३ बाट ५८ हजार ८१४ मतले विजयी, न्युरोलोजी विशेषज्ञ हुन्। उनी राष्ट्रिय न्युरो केन्द्रका निर्देशक, नेपाल स्ट्रोक संघका अध्यक्ष, र विश्वस्तरीय न्युरोलोजी नेटवर्कसँग आबद्ध छन्। थापाले नेपालमा थ्रोम्बोलाइसिस थेरापीको पहिलो प्रयोग र दुर्लभ न्युरोलोजिकल रोग पहिचानमा योगदान गरेका छन्।

डा. तोसिमा कार्की, ललितपुर–३ बाट ४३ हजार ९६ मत सहित फराकिलो मतले जित हासिल गरिन । उनी शल्य–चिकित्सामा विशेषज्ञ हुन् र पूर्व स्वास्थ्य राज्यमन्त्री रहिसकेकी छिन्। उनी डा. गोविन्द केसीका समर्थनकर्ता र चिकित्सा शिक्षा सुधारका अभियन्ता पनि हुन्।

आनन्दबहादुर चन्द, कैलाली–५ बाट ३१ हजार ९५३ मत ल्याएर पहिलो पटक सांसद बनेका जनस्वास्थ्य विज्ञ हुन्। उनी सुर्तीजन्य पदार्थ नियन्त्रण र नसर्ने रोगविरुद्धका अभियानका प्रख्यात अभियन्ता हुन्। 

डा. शम्भुकुमार यादव, सिराहा–३ बाट ३२ हजार २४९ मत ल्याएर  विजय भएका  निर्वाचित यादव स्थानीय स्वास्थ्य सेवा र सामाजिक उत्तरदायित्वमा परिचित चिकित्सक हुन्।

दीपककुमार साह, महोत्तरी–२ बाट ३२ हजार ७२२ मत ल्याएर विजय हुने दृष्टिरोग विशेषज्ञ र जनस्वास्थ्यमा दक्ष छन्।

आशा झा, मोरङ–५ बाट ३० हजार ४३४ मत प्राप्त गर्दै विजय हासिल गरिन् । १६ वर्षभन्दा बढी स्वास्थ्य स्वयंसेविकाका रूपमा ग्रामीण समुदायमा सेवा दिँदै आएकी हुन्।

यी चिकित्सक र स्वास्थ्यकर्मीहरूले उपचार मात्र होइन, स्वास्थ्य प्रणाली सुधार र नीति निर्माणमा पनि सक्रिय भूमिका खेल्ने लक्ष्य लिएर  संसद प्रवेश गरेका छन्। उनीहरूको अनुभवले नेपालमा स्वास्थ्य सेवा सुधारको नयाँ आशा जगाउने  छ।