छात्रवृत्ति करारका चिकित्सक र नर्सको तलबमा ढिलाइ, तत्काल भुक्तानी गर्न फ्रन्टलाइन डक्टर्स नेपालको माग

नेपाल हेल्थ न्युज, जनकपुरधाम । मधेश प्रदेशका विभिन्न सरकारी अस्पतालमा छात्रवृत्ति करार अन्तर्गत कार्यरत चिकित्सक तथा नर्स कर्मचारीहरूको तलब तथा भत्ता लामो समयदेखि रोकिएको भन्दै फ्रन्टलाइन डक्टर्स नेपाल (एफ.डी.एन)ले तत्काल भुक्तानी गर्न माग गरेको छ ।

एफ.डी.एनले स्वास्थ्य सचिव, स्वास्थ्य तथा जनसंख्या मन्त्रालय, मधेश प्रदेशलाई सम्बोधन गर्दै जारी गरेको विज्ञप्तिमा प्रदेशभर कार्यरत चिकित्सक तथा स्वास्थ्यकर्मीहरूले स्वास्थ्य सेवा प्रवाहमा महत्वपूर्ण योगदान दिँदै आएको उल्लेख गरिएको छ ।

तर पछिल्लो समय तलब तथा भत्ता समयमै उपलब्ध हुन नसकेको समस्या गम्भीर बन्दै गएको जनाइएको छ ।

विज्ञप्तिअनुसार हालसम्म ३ देखि ५ महिनासम्मको तलब तथा अन्य भत्ताहरू भुक्तानी हुन नसकेको अवस्था रहेको छ । यसले स्वास्थ्यकर्मीहरूको पेशागत मनोबलमा नकारात्मक असर पारेको र स्वास्थ्य सेवाको नियमितता तथा प्रभावकारितामा समेत असर पर्ने जोखिम बढेको एफ.डी.एनको भनाइ छ ।

एफ.डी.एनले सम्बन्धित निकायहरूलाई बक्यौता तलब तथा भत्ता यथाशीघ्र निकासा गरी नियमित रूपमा भुक्तानी हुने व्यवस्था मिलाउन आग्रह गरेको छ । साथै, समस्या तत्काल समाधान नभएमा थप सशक्त कदम चाल्न बाध्य हुने चेतावनी समेत दिएको छ ।

यस विषयमा मुख्यमन्त्री तथा मन्त्रिपरिषद् कार्यालय, स्वास्थ्य तथा जनसंख्या मन्त्रालय (मधेश प्रदेश र संघीय), स्वास्थ्य सेवा विभाग, नेपाल मेडिकल काउन्सिल तथा नेपाल मेडिकल एसोसिएसन लगायत सम्बन्धित निकायहरूलाई पनि बोधार्थ पठाइएको छ ।