खुद्रा औषधि व्यवसायीलाई क्षयरोग नियन्त्रणमा साझेदार बनाउन आग्रह

नेपाल हेल्थ न्युज, काठमाडौं । विश्व क्षयरोग दिवसका अवसरमा नेपाल औषधि व्यवसायी संघ काठमाडौं जिल्ला शाखाले क्षयरोग नियन्त्रण अभियानमा खुद्रा औषधि व्यवसायीलाई औपचारिक रूपमा राष्ट्रिय साझेदार बनाउन आग्रह गरेको छ ।

विश्व स्वास्थ्य संगठन का अनुसार क्षयरोग अझै विश्वकै प्रमुख संक्रामक रोगमध्ये एक हो भने नेपालमा पनि यसको चुनौती कायम छ । विशेषगरी औषधि प्रतिरोधी क्षयरोग डिआर टिबी बढ्दो चिन्ताको विषय बनेको छ ।

संघले बिरामीको पहिलो सम्पर्क गर्ने स्थलका रूपमा औषधि पसल रहने भएकाले क्षयरोगको प्रारम्भिक पहिचान, परीक्षणका लागि रेफरल र उपचारमा सहयोग गर्न फार्मेसीहरूलाई ‘फस्ट प्वाइन्ट अफ कन्ट्याक्ट’ का रूपमा समेट्नुपर्ने जनाएको छ ।

संघले जापान नेपाल हेल्थ एण्ड ट्युवरकुलोसिस रिसर्च एसोसिएसन (जन्त्र)  सँगको सहकार्यमा समुदायस्तरमा क्षयरोग पहिचान र रेफरलमा काम गर्दै आएको पनि जनाएको छ । अब राष्ट्रिय क्षयरोग नियन्त्रण केन्द्रसँग सार्वजनिक–निजी साझेदारी अन्तर्गत औपचारिक सहकार्य आवश्यक रहेको माग गरिएको छ ।

नेपाल औषधि व्यवसायी जिल्ला शाखा काठमाडौंका अध्यक्ष शंकर महर्जन र महासचिव शुभमान श्रेष्ठद्धारा हस्ताक्षरित विज्ञप्तीमा क्षयरोगको लक्षण भएका व्यक्तिको प्रारम्भिक पहिचान, जनचेतना अभिवृद्धि, उपचार निरन्तरता सुनिश्चित र औषधिको विवेकपूर्ण प्रयोगमार्फत क्षयरोग नियन्त्रणमा सक्रिय भूमिका खेल्ने प्रतिबद्धता पनि व्यक्त गरिएको छ ।