२१ खर्बभन्दा बढीको बजेट सार्वजनिक: स्वास्थ्य क्षेत्रमा १ खर्ब १ अर्ब ९५ करोड विनियोजन

नेपाल हेल्थ न्युज, काठमाडौँ । सरकारले आगामी आर्थिक वर्षका लागि कुल २१ खर्ब २४ अर्ब ३४ करोड रुपैयाँ बराबरको बजेट सार्वजनिक गरेको छ । अर्थमन्त्री डा। स्वर्णिम वाग्ले ले शुक्रबार संघीय संसद्को संयुक्त बैठकमा बजेट प्रस्तुत गरेका हुन् ।

सरकारले प्रस्तुत गरेको बजेटअनुसार चालुतर्फ १२ खर्ब ७० अर्ब रुपैयाँ विनियोजन गरिएको छ भने पूँजीगततर्फ ४ खर्ब ३१ अर्ब रुपैयाँ छुट्याइएको छ । वित्तीय व्यवस्थातर्फ ४ खर्ब २२ अर्ब रुपैयाँ विनियोजन गरिएको अर्थमन्त्री वाग्लेले जानकारी दिए ।

राजस्व संकलनको लक्ष्य १४ खर्ब ४ अर्ब रुपैयाँ निर्धारण गरिएको छ । त्यसैगरी वैदेशिक अनुदानबाट ६१ अर्ब ७४ करोड रुपैयाँ प्राप्त हुने अनुमान गरिएको छ भने वैदेशिक ऋणतर्फ २ खर्ब ४७ अर्ब रुपैयाँ परिचालन गरिने उल्लेख गरिएको छ ।

सरकारले आन्तरिक ऋणमार्फत ४ खर्ब १० अर्ब रुपैयाँ जुटाउने लक्ष्य समेत लिएको छ ।

यस वर्षको बजेटमा स्वास्थ्य क्षेत्रलाई प्राथमिकतामा राख्दै १ खर्ब १ अर्ब ९५ करोड रुपैयाँ विनियोजन गरिएको छ । स्वास्थ्य बीमा कार्यक्रम सञ्चालनका लागि मात्रै १५ अर्ब रुपैयाँ छुट्याइएको सरकारले जनाएको छ ।

सरकारले स्वास्थ्य सेवा विस्तार, बीमा कार्यक्रमको प्रभावकारिता, अस्पताल पूर्वाधार सुदृढीकरण तथा जनस्वास्थ्य सेवामा पहुँच अभिवृद्धिलाई मुख्य प्राथमिकतामा राखेको बताएको छ ।