लायन्स क्लब अफ काठमाण्डौ रेडिएन्स डक्टर्सको अध्यक्षमा बालरोग विशेषज्ञ डा रेश्मा लामिछाने

नेपाल हेल्थ न्युज, काठमाडौं। अस्पतालको व्यस्त कार्यतालिका, बिरामीको उपचार र स्वास्थ्य सेवाको जिम्मेवारीबीच पनि समाजप्रतिको उत्तरदायित्वलाई निरन्तरता दिन सकिन्छ भन्ने उदाहरण बनेको छ लायन्स क्लब अफ काठमाण्डौ रेडिएन्स डक्टर्स।

चिकित्सकहरूको विशेष तथा विशिष्ट क्लबका रूपमा परिचित यस क्लबले आफ्नो पाँचौं वार्षिकोत्सवको अवसरमा नयाँ नेतृत्व चयन गर्दै बालरोग विशेषज्ञ डा. रेश्मा लामिछानेलाई अध्यक्षको जिम्मेवारी सुम्पिएको छ।

लायन्स क्लब्स इन्टरनेसनल डिस्ट्रिक्ट ३२५ जी अन्तर्गत सञ्चालन हुँदै आएको यो क्लब स्वास्थ्य क्षेत्रका विशेषज्ञ चिकित्सकहरूलाई सामाजिक सेवासँग जोड्ने साझा मञ्चका रूपमा स्थापित हुँदै आएको छ। क्लबले पाँच वर्षको यात्रामा स्वास्थ्य, मानवीय सेवा र नेतृत्व विकासका क्षेत्रमा विभिन्न कार्यक्रम सञ्चालन गर्दै आफ्नो छुट्टै पहिचान बनाएको छ।

‘व्यस्तता बहाना होइन, सेवाको अवसर हो’

पदभार ग्रहणपछि अध्यक्ष डा. लामिछानेले चिकित्सकहरूको व्यस्त कार्यतालिकाका बाबजुद पनि सामाजिक सेवाबाट पछि हट्न नसकिने बताउनुभयो।

उहाँका अनुसार एक चिकित्सकको दैनिकी अत्यन्त व्यस्त हुने भए पनि समाजप्रतिको उत्तरदायित्वलाई सधैं प्राथमिकतामा राख्नुपर्छ। समयको उचित व्यवस्थापन गर्दै लायन्सका सेवामूलक अभियानहरूमा निरन्तर सक्रिय रहनु नै क्लबको वास्तविक पहिचान भएको उहाँले उल्लेख गर्नुभयो।

'एक चिकित्सकका रूपमा हाम्रो दैनिकी निकै व्यस्त हुन्छ, तर समाजप्रतिको उत्तरदायित्वलाई हामीले कहिल्यै भुलेका छैनौँ। व्यस्तताका बाबजुद समय व्यवस्थापन गरेर लायन्सका सेवामूलक क्षेत्रमा निरन्तर लागिरहनु र समाजलाई केही योगदान दिनु नै हाम्रो क्लबको विशेषता हो'-उहाँले भन्नुभयो।

सेवा र नेतृत्व विकासलाई प्राथमिकता

नयाँ कार्यसमितिले पदभार ग्रहण गरेकै दिनदेखि वार्षिक सेवा तथा नेतृत्व विकासका कार्यक्रम कार्यान्वयन सुरु गरेको छ।

पहिलो चरणमा सम्पदा संरक्षण तथा सरसफाइ अभियान सुरु गरिएको छ। यससँगै सर्वसाधारणलाई लक्षित गरी निःशुल्क स्वास्थ्य शिविर सञ्चालन गरिने भएको छ, जहाँ विभिन्न विधाका विशेषज्ञ चिकित्सकहरूले प्रत्यक्ष स्वास्थ्य सेवा प्रदान गर्नेछन्।

क्लबका अनुसार आगामी एक वर्षमा स्वास्थ्य सेवा विस्तारसँगै वातावरण संरक्षण, भोकमरी न्यूनीकरण, बाल स्वास्थ्य प्रवर्द्धन तथा समुदायमा सकारात्मक नेतृत्व विकासका कार्यक्रमलाई विशेष प्राथमिकता दिइनेछ।

पाँच वर्षको यात्राबाट अझ प्रभावकारी सेवातर्फ

पाँच वर्ष पूरा गरेको अवसरमा क्लबले अब सेवाका दायरालाई अझ फराकिलो बनाउने लक्ष्य लिएको जनाएको छ। स्वास्थ्य क्षेत्रमा मात्र सीमित नरही लायन्स इन्टरनेसनलका प्रमुख प्राथमिकताअनुसार पर्यावरण संरक्षण, पोषण तथा भोकमरी न्यूनीकरण, बाल स्वास्थ्य, समुदायमा जनचेतना अभिवृद्धि तथा सामाजिक उत्तरदायित्वका विविध अभियान सञ्चालन गरिने योजना सार्वजनिक गरिएको छ।

कार्यक्रममा डिस्ट्रिक्ट ३२५ जी का पदाधिकारीहरू, विभिन्न विधाका वरिष्ठ तथा युवा चिकित्सक लायन सदस्यहरू तथा सामाजिक क्षेत्रका व्यक्तित्वहरूको उल्लेखनीय उपस्थिति रहेको थियो।

चिकित्सा र सेवाको सन्तुलित अभ्यास

चिकित्सकको भूमिका केवल अस्पताल वा क्लिनिकभित्र सीमित हुँदैन भन्ने सन्देशलाई आत्मसात् गर्दै लायन्स क्लब अफ काठमाण्डौ रेडिएन्स डक्टर्सले चिकित्सा सेवा र सामाजिक सेवाबीच सन्तुलित अभ्यासलाई निरन्तरता दिँदै आएको छ। नयाँ नेतृत्वसँगै क्लबले आगामी दिनमा अझ प्रभावकारी, दिगो र समुदायमुखी सेवामूलक कार्यक्रमहरू सञ्चालन गर्ने अपेक्षा गरिएको छ।