इनर ह्विल क्लब अफ महालक्ष्मीको नयाँ कार्यसमिति पदस्थापन

नेपाल हेल्थ न्युज, काठमाडौं । विश्वकै ठूलो महिला स्वयंसेवी सेवा संस्थामध्ये एक इनर ह्विलको स्थानीय शाखा इनर ह्विल क्लब अफ महालक्ष्मीको नयाँ कार्यसमितिको पदस्थापन समारोह सम्पन्न भएको छ ।

नयाँ कार्यसमितिमा प्रेमा गुरुङ अध्यक्ष, उषा बुढाथोकी उपाध्यक्ष, निशा श्रेष्ठ सचिव तथा धनकुमारी राई कोषाध्यक्षमा पदस्थापित हुनुभएको छ । त्यसैगरी मन्नु थापा आईएसओ (इन्टरनेशनल सर्भिस अर्गनाइजर), डा. देवकी शाक्य गुभाजु सम्पादक (इडिटर) तथा पूजा खनाल, प्रनिशा बस्नेत, अञ्जना श्रेष्ठ र आशा थापा कार्यकारी सदस्यका रूपमा जिम्मेवारी सम्हाल्नुभएको छ ।

डा. देवकी शाक्य गुभाजुका अनुसार, श्रावण १४ गते काठमाडौंको कोटेश्वरस्थित दी बुके होटलमा आयोजित विशेष समारोहबीच क्लबको नयाँ नेतृत्वले आगामी कार्यकालका लागि औपचारिक रूपमा जिम्मेवारी ग्रहण गरेको हो । कार्यक्रममा विभिन्न क्षेत्रका सामाजिक व्यक्तित्व, क्लबका सदस्य तथा शुभेच्छुकहरूको उल्लेखनीय सहभागिता रहेको थियो ।

नवनिर्वाचित अध्यक्ष प्रेमा गुरुङले नयाँ कार्यसमितिले सेवा, सहकार्य र समर्पणलाई प्राथमिकतामा राख्दै समुदायको आवश्यकता अनुसार सामाजिक कार्यक्रम सञ्चालन गर्ने प्रतिबद्धता व्यक्त गर्नुभयो । उहाँले सबै सदस्यहरूको सक्रिय सहभागितामार्फत क्लबलाई अझ सशक्त, प्रभावकारी र उदाहरणीय सामाजिक संस्थाका रूपमा स्थापित गर्ने विश्वास व्यक्त गर्नुभयो ।

समारोहमा वक्ताहरूले महिलाको नेतृत्व र सहभागिताले समाजमा दिगो परिवर्तन ल्याउन सक्ने उल्लेख गर्दै इनर ह्विलले वर्षौंदेखि सामाजिक उत्तरदायित्वका क्षेत्रमा पु¥याउँदै आएको योगदानको प्रशंसा गरेका थिए । उनीहरूले मित्रता, सहकार्य र सेवाभावलाई केन्द्रमा राखेर आगामी दिनमा अझ प्रभावकारी सामाजिक अभियान सञ्चालन गर्नुपर्ने आवश्यकता औँल्याए ।
 
क्लबले यस वर्षका लागि ‘ग्रो एण्ड फ्लरिश’ अर्थात् ‘बढौँ र समृद्ध बनौँ’ भन्ने नारालाई आफ्नो मूल अभियानका रूपमा अघि सारेको छ । नयाँ नेतृत्वले यस नारालाई आत्मसात गर्दै सामाजिक सेवा, महिला नेतृत्व विकास, स्वास्थ्य सचेतना, शिक्षा, वातावरण संरक्षण तथा समुदाय केन्द्रित कार्यक्रमलाई थप प्रभावकारी रूपमा सञ्चालन गर्ने प्रतिबद्धता जनाएको छ ।

सामाजिक सेवामा महिलाको सक्रिय नेतृत्वलाई अझ सुदृढ बनाउँदै समुदायमा सकारात्मक परिवर्तनको अभियानलाई निरन्तरता दिने लक्ष्यका साथ इनर ह्विल क्लब अफ महालक्ष्मीले आफ्नो नयाँ कार्यकालको औपचारिक सुरुवात गरेको जनाएको छ ।
 

इनर ह्विल क्लब पूर्ण रूपमा महिलाहरूको सहभागितामा सञ्चालन हुने अन्तर्राष्ट्रिय स्वयंसेवी संस्था हो । समाजसेवा, मानवीय सहयोग, महिला सशक्तीकरण, शिक्षा, स्वास्थ्य तथा समुदाय विकासका विविध क्षेत्रमा योगदान पु¥याउने उद्देश्यले यस संस्थाले विश्वभर सक्रिय रूपमा काम गर्दै आएको छ ।

सन् १९२४ मा बेलायतमा मार्गरेट गोल्डिङ द्वारा स्थापना गरिएको इनर ह्विल आज विश्वका सयौँ देशमा फैलिएको महिला स्वयंसेवी सञ्जालका रूपमा परिचित छ । संस्थाले साँचो मित्रता, व्यक्तिगत सेवा र अन्तर्राष्ट्रिय समझदारीलाई आफ्नो मूल आधार मान्दै समाजमा सकारात्मक परिवर्तनका लागि निरन्तर काम गर्दै आएको छ ।