नर्सहरूको १५ बुँदे मागसहित वीर अस्पतालमा प्रदर्शन

नेपाल हेल्थ न्युज, काठमाडौं । विभिन्न माग राख्दै आन्दोलनरत नर्सहरूले सोमबार काठमाडौंमा प्रदर्शन गरेका छन्।

नर्सिङ क्षेत्रको सुधारको माग गर्दै नर्स ज्योति रानाभाटले सुरु गरेको आमरण अनशनको पाँचौँ दिन नर्सहरूले काठमाडौंस्थित वीर अस्पतालमा प्रदर्शन गरेका हुन्।

प्रदर्शनमा सहभागी नर्सहरूले न्यूनतम पारिश्रमिकको सुनिश्चितता, श्रमशोषणको अन्त्य, नर्सिङ क्षेत्रको सुधारका लागि स्पष्ट योजना लगायतका १५ बुँदे माग अघि सारेका छन्।

प्रदर्शनका क्रममा उनीहरूले ‘१५ बुँदे माग पूरा गर’, ‘ज्योतिको जीवन बचाउ’, ‘न्यायमा ढिलाइ जीवनमा जोखिम’, ‘नर्सिङ सुधारको स्पष्ट रोडम्याप’ र ‘नर्स बचाऔँ, स्वास्थ्य बचाऔँ’ लेखिएका प्लेकार्ड प्रदर्शन गरेका थिए।

आन्दोलनरत नर्सहरूले आफ्ना माग सम्बोधन नभएसम्म संघर्ष जारी राख्ने बताएका छन्।