हुम्लाकी किशोरीको उपचारका लागि हेलिकप्टरमार्फत उद्धार

नेपाल हेल्थ न्युज,हुम्ला । चंखेली गाउँपालिका–६ की १८ वर्षीया धनशिला बुढाको आकस्मिक स्वास्थ्य समस्या देखिएपछि नेपाली सेनाको हेलिकप्टरमार्फत उद्धार गरी सुर्खेतस्थित प्रादेशिक अस्पताल पठाइएको छ।

सुत्केरी पीडाबाट ग्रसित बुढालाई सुरुमा हुम्ला जिल्ला अस्पतालमा ल्याइए पनि आवश्यक उपचार सम्भव नहुँदा उनलाई अन्यत्र रेफर गरिएको जिल्ला स्वास्थ्य कार्यालय हुम्लाका निमित्त प्रमुख प्रतिक्षा भारतीले जानकारी दिनुभयो ।

उहाँका अनुसार बुढाको गर्भअवस्था ३२ हप्तामै सुत्केरी बेथा देखिएको थियो भने शरीरमा गम्भीर रक्तस्रावको समस्या देखिन थालेपछि जिल्ला अस्पतालबाट उपचार सम्भव नभएपछि तत्कालै उच्च चिकित्सा सेवा आवश्यक देखिएको हो।

राष्ट्रपति महिला उत्थान कार्यक्रमअन्तर्गत उद्धार गरिएको यो घटनामा नेपाली सेनाको सहयोगमा हवाईमार्ग प्रयोग गरी उनलाई सुर्खेत पुर्‍याइएको हो।