प्रधानमन्त्री ओलीको स्वास्थ्यकर्मीलाई आग्रह – 'सचेत र जिम्मेवार बन्नुस्'

नेपाल हेल्थ न्युज, काठमाडौं । प्रधानमन्त्री केपी शर्मा ओलीले स्वास्थ्यकर्मीहरूलाई सचेत र जिम्मेवार बन्न आग्रह गर्नुभएको छ।

राष्ट्रिय स्वास्थ्यकर्मी महासंघ नेपालको पाँचौं महाधिवेशनमा उहाँले चिकित्सा क्षेत्रको महत्व मान्छेको आयुसँग गाँसिएको भन्दै स्वास्थ्यकर्मीले नागरिक र राष्ट्रिय दायित्व दुबै बुझ्नुपर्ने बताउनुभयो ।

ओलीले चिकित्सक र नर्सले कठिन परिस्थितिमा पनि जीवन बचाएको अनुभव सुनाउँदै डाक्टरहरू भगवानभन्दा महान् हुने बताउनुभयो । बिरामी हुन नदिनै ध्यान दिनुपर्नेमा जोड दिँदै ओलीले सस्तो र सजिलो तरिकाले गुणस्तरीय उपचार दिनुपर्ने धारणा राख्नुभयो । 

चिकित्सा विज्ञानको प्रगतिका कारण आफू आज जीवित रहेको उल्लेख गर्दै ओलीले रोकथाममा केन्द्रित स्वास्थ्य सचेतनामा महासंघले भूमिका खेलोस् भन्ने अपेक्षा व्यक्त गर्नुभयो ।