महेन्द्रझ्याडी स्वास्थ्य चौकी जिल्लाकै ‘नमूना स्वास्थ्य संस्था’ घोषित

नेपाल हेल्थ न्युज, सिन्धुली । हरिहरपुरगढी  सिन्धुली जिल्लाको हरिहरपुरगढी गाउँपालिका–५ मा रहेको महेन्द्रझ्याडी स्वास्थ्य चौकीलाई जिल्लाकै ‘नमूना स्वास्थ्य संस्था’ घोषणा गरिएको छ।

शनिबार जनस्वास्थ्य कार्यालय सिन्धुलीले आयोजना गरेको विशेष कार्यक्रममार्फत स्वास्थ्य चौकीलाई उक्त उपाधि प्रदान गरिएको हो। कार्यक्रममा जनस्वास्थ्य कार्यालय सिन्धुलीका प्रमुख विमल पटेलले स्वास्थ्य चौकीले न्यूनतम सेवा मापदण्ड (एमएसएस) मूल्यांकनमा जिल्लाकै सबैभन्दा उच्च ९० अंक प्राप्त गरेपछि नमूना स्वास्थ्य संस्था घोषणा गरिएको जानकारी दिनुभएको  छ।

सो अवसरमा प्रमुख पटेलले हरिहरपुरगढी गाउँपालिकाका अध्यक्ष वज्रध्वज वाइबालाई प्रमाणपत्रसहित आवश्यक सामग्री हस्तान्तरण गर्नुभएको थियो।

कार्यक्रमअघि पटेलको नेतृत्वमा जिल्लाका ९ वटै स्थानीय तहका स्वास्थ्य शाखा प्रमुखहरूले स्वास्थ्य चौकीको निरीक्षण तथा अवलोकन गरेका थिए।

स्वास्थ्य सेवा गुणस्तर वृद्धिको उदाहरणको रूपमा महेन्द्रझ्याडी स्वास्थ्य चौकीलाई नमूना बनाइएको जनस्वास्थ्य कार्यालयको भनाइ छ।