कोरोना संक्रमणबाट एक जनाको मृत्यु

नेपाल हेल्थ न्युज, पोखरा । पोखरामा एक जना ७० वर्षीया महिलाको कोभिड-१९ संक्रमणका कारण मृत्यु भएको पुष्टि भएको छ। पोखरास्थित चरक अस्पतालमा उपचाररत महिलाको साउन ४ गते निधन भएको हो।

स्वास्थ्य निर्देशनालय गण्डकीका महानिर्देशक खिमबहादुर खड्काका अनुसार, असार २५ गते उनीमा कोरोना संक्रमण पुष्टि भएको थियो।

श्वासप्रश्वासमा समस्या देखिएपछि अस्पतालमा भर्ना गरिएकी ती महिलामा मधुमेह र उच्च रक्तचापजस्ता पुराना स्वास्थ्य समस्या पनि रहेको बताइएको छ।

उनको कोरोना परीक्षण गण्डकी प्रदेश जनस्वास्थ्य प्रयोगशालामा गरिएको थियो। पछिल्ला दिनमा गण्डकी प्रदेशमा कोरोना संक्रमण फेरी बढ्न थालेको पाइएको छ।

स्वास्थ्य निर्देशनालयका अनुसार हाल कास्कीमा ५ जना, बागलुङमा २ जना र स्याङ्जामा १ जना गरी गण्डकीमा कुल ८ जनामा कोरोना पुष्टि भएको छ।