सिन्धुलीका युवकको मिर्गौला चोरी, चार जना पक्राउ

काठमाडौं, नेपाल हेल्थ न्यूज। रोजगारीको प्रलोभनमा परेका सिन्धुली दुधौली–१ का ३७ वर्षीय खिलबहादुर भुजेलको मिर्गौला चोरीको घटनामा संलग्न चारजनालाई प्रहरीले काभ्रे र काठमाडौंबाट पक्राउ गरेको छ।

मानव बेचबिखन अनुसन्धान ब्यूरोका अनुसार भुजेललाई भारत लैजाने क्रममा काठमाडौंबाटै लगिएको पुष्टि भएको छ।

प्रमुख कृष्ण पंगेनीका अनुसार नुवाकोटका परियार थरका एक जनालाई टोखाबाट नियन्त्रणमा लिइएको हो भने अन्य तीन जनाको सनाखत प्रक्रिया चलिरहेको छ।

पीडित भुजेल पेट दुखेपछि चिकित्सककहाँ जाँदा एउटा मिर्गौला नरहेको थाहा पाएका थिए। घटनाबारे प्रहरीलाई जानकारी गरिएपछि अनुसन्धान सुरु गरिएको थियो। प्रहरीले घटनासँग सम्बन्धित थप व्यक्तिको खोजी गरिरहेको छ।