प्रदेश अस्पतालमा बिरामीलाई शय्या अभाव

नेपाल हेल्थ न्युज, पर्वत । जाडोयाम सुरु हुनासाथ पर्वत अस्पतालमा बिरामीको चाप तीव्र बढेको छ । पछिल्ला दिनमा अस्पतालमा आउने बिरामीको सङ्ख्या उल्लेख्य रूपमा वृद्धि भएपछि शय्या अभावको समस्या देखिएको छ ।

मेडिकल सुपरिटेन्डेन्ट डा. हेमन्त बाँस्तोलाका अनुसार बिरामीको संख्या बढेसँगै कतिपयलाई आकस्मिक कक्षमै वा भुइँमा राखेर उपचार गर्नुपर्ने अवस्था आएको छ । उहाँका भनाइअनुसार हाल आउने अधिकांश बिरामी भर्ना गरेर उपचार गर्नुपर्ने खालका छन् ।

‘जनरल वार्ड’का सबै शय्या भरिएपछि भर्ना गर्नुपर्ने बिरामीलाई आकस्मिक उपचारका लागि छुट्याइएका शय्यामा राखिएको अस्पतालले जनाएको छ । अहिले दैनिक करिब ३५० देखि ३९६ जनासम्मले ओपीडी र इमर्जेन्सी सेवा लिइरहेका छन् ।

१५ शय्याको स्वीकृत क्षमता भएको प्रदेश अस्पतालले हाल ६४ शय्या सञ्चालनमा ल्याएर सेवा विस्तार गरेको छ । सीमित जनशक्तिलाई परिचालन गर्दै बिहान ७ बजेदेखि साँझ ७ बजेसम्म बहिरङ्ग सेवा सञ्चालन भइरहेको छ ।

डा. बाँस्तोलाले भने, “भर्ना गरेर राख्ने सबै शय्या भरिएका छन् । गर्मी सकिएर चिसो बढ्दै जाँदा हरेक वर्ष यो समयमा बिरामीको सङ्ख्या उल्लेख्य रूपमा बढ्ने गर्छ ।”

सिजनल फ्लुका कारण बालबालिका र ज्येष्ठ नागरिक बढी प्रभावित भएका छन् । डा. एनिस श्रेष्ठका अनुसार पछिल्लो समयमा एकै दिनमा १८ जना बालबालिकालाई ज्वरो, रुघाखोकी र बान्ता आदिका कारण भर्ना गरेर उपचार गरिएको छ । ज्येष्ठ नागरिकमा भने दम र श्वासप्रश्वाससम्बन्धी समस्या बढी देखिएको छ ।

अस्पतालको आकस्मिक कक्षमा दैनिक करिब ४० जना बिरामी उपचारका लागि पुग्ने गरेका छन्, जसमा ज्वरो, दम, झाडापखाला, बान्ता तथा सवारी दुर्घटनाका घाइते समेत रहेका छन् ।