पर्सा प्रहरीद्वारा ६७ युनिट रगत सङ्कलन

नेपाल हेल्थ न्युज, वीरगन्ज । ७० औँ नेपाल प्रहरी दिवसको अवसरमा पर्सा जिल्लामा रक्तदान कार्यक्रम सम्पन्न भएको छ। जिल्ला प्रहरी कार्यालय पर्सा र प्रदेश प्रहरी कार्यालय वीरगन्जको संयुक्त आयोजनामा सम्पन्न कार्यक्रममा ६७ युनिट रगत संकलन गरिएको हो।

रक्त अभावमा पर्ने बिरामीहरूलाई सहायता पुर्‍याउने उद्देश्यले यो रक्तदान कार्यक्रम गरिएको आयोजकहरूले जनाएका छन्। कार्यक्रमको उद्घाटन नेपाल प्रहरी प्रदेश कार्यालय वीरगन्जका प्रमुख शान्तिराज कोइराला र जिल्ला प्रहरी प्रमुख सुदीपराज पाठकले रक्तदातालाई रक्त संकलन झोला (ब्लड ब्याग) हस्तान्तरण गरी गर्नुभएको थियो।

जिल्ला प्रहरी प्रमुख पाठकले प्रहरी दिवसको सन्दर्भमा विभिन्न सामाजिक कार्यहरू गर्दै आएको जानकारी दिनुभयो। उहाँका अनुसार, बुधबार धार्मिकस्थलहरूमा सरसफाइ गरिएको थियो भने आज रक्तदान कार्यक्रम सम्पन्न गरिएको हो। भोलि प्रहरी दिवसको मुख्य कार्यक्रम आयोजना गरिने तयारी भइरहेको पनि उहाँले जानकारी दिनुभयो।