स्वास्थ्य बीमा नवीकरणमा केवाईसी अद्यावधिक अनिवार्य

नेपाल हेल्थ न्युज, काठमाडौं । स्वास्थ्य बीमा बोर्डले स्वास्थ्य बीमा नवीकरण गर्नुअघि परिवारका सबै सदस्यको केवाईसी विवरण अद्यावधिक गर्न अनिवार्य गरेको छ।

बोर्डले नवीकरण प्रक्रियालाई व्यवस्थित बनाउन यस्तो व्यवस्था लागू गरेको जनाएको छ। यससँगै हाललाई कनेक्ट आईपीएस, इसेवा तथा खल्ती लगायतका डिजिटल भुक्तानी माध्यमबाट सिधै स्वास्थ्य बीमा नवीकरण गर्ने सेवा अस्थायी रूपमा स्थगित गरिएको छ।

बोर्डले सम्पूर्ण बीमितहरूलाई स्वास्थ्य बीमा नवीकरण गर्नुअघि बोर्डको आधिकारिक एचआईबी ई-पोर्टलमा लगइन गरी आफ्नो पुरानो बीमा विवरण हेर्न तथा परिवारका सबै सदस्यको केवाईसी विवरण अद्यावधिक गर्न अनुरोध गरेको छ।

परिवारका सबै सदस्यको केवाईसी अद्यावधिक गरेपछि मात्रै स्वास्थ्य बीमा नवीकरण प्रक्रिया अगाडि बढाउन सकिने बोर्डले स्पष्ट पारेको छ।